بایدن: كاندیدای كۆمارییه‌كان بۆ پۆستی جێگری سه‌رۆكی داهاتووی ئه‌مه‌ریكا كۆپی تره‌مپه
سه‌رۆكی ئه‌مه‌ریكا ڕه‌خنه له كاندیدای كۆمارییه‌كان بۆ پۆستی جێگری سه‌رۆكی داهاتووی ئه‌مه‌ریكا ده‌گرێت و پێی وایه هه‌ڵسوكه‌وت و مه‌زاجه سیاسییه‌كانی هاوشێوه‌ی تره‌مپه.
جۆو بایدن، سه‌رۆكی ئه‌مه‌ریكا له لێدوانێكی ڕۆژنامه‌وانیدا ڕایگه‌یاند، هیچ جیاوازییه‌ك له نێوان جه‌ی دی ڤانس، كاندیدای كۆمارییه‌كان بۆ پۆستی جێگری سه‌رۆكی داهاتووی ئه‌مه‌ریكا و دۆناڵد تره‌مپ، كاندیدای كۆمارییه‌كان بۆ سه‌رۆكی داهاتووی ئه‌مه‌ریكا نییه. گوتیشی "ئه‌وان كۆپی یه‌كدین."
ڕۆژی دووشەممە 15ـی تەمووزی 2024 دۆناڵد ترەمپ وەک بەربژێری کۆمارییەکان بۆ هەڵبژاردنی سەرۆکایەتی ئەمەریکا هەڵبژێردرا، هاوكات ترەمپ، سیناتۆر جیمس دەیڤد ڤانسی بە جێگری خۆی دەستنیشان کرد.
ڕۆژی 7ـی حوزه‌یرانی 2024، هه‌ڵمه‌تی بانگه‌شه‌ی هه‌ڵبژاردنی دۆناڵد تره‌مپ، سه‌رۆكی پێشووی ئه‌مه‌ریكا داوای به‌ڵگه‌نامه‌ی له هه‌شت كاندیدا كرد کە نیوەیان سیناتۆرن، بۆ ئه‌وه‌ی تره‌مپ یه‌كێكیان بۆ جێگری سه‌رۆكی ئه‌مه‌ریكا هه‌ڵبژێرێت.
هه‌ر یه‌ك له ماركۆ ڕۆبیۆ، جه‌ی دی ڤانس، تیم سكۆت، دۆگ بۆرگۆم، بێن كارسۆن، تۆم كۆتۆن و بایرۆن دۆناڵدز و ئیلێز ستیفانیك داوایان لێ كراوه به‌ڵگه‌نامه و زانیارییه‌كانیان پێشكه‌ش به هه‌ڵمه‌تی بانگه‌شه‌ی هه‌ڵبژاردنی تره‌مپ بكه‌ن.
ڕۆژنامه‌ی واشنتن پۆست، ئاماژه‌ی به‌وه كردبوو، هه‌ر یه‌كێك له‌م ناوانه، ئه‌زموونیان له حكوومه‌تدا هه‌یه، هاوكات له‌و قه‌یرانه دادوه‌رییه‌ی تره‌مپ له ماوه‌كانی ڕابردوودا دووچاری هاتبوو، له پاڵیدا وه‌ستاونه‌ته‌وه و دڵسۆزی خۆیان بۆ دووپات كردووه‌ته‌وه.
واشنتن پۆست سه‌رنجی بۆ ئه‌وه ڕاكێشاوه، تره‌مپ زیاتر په‌یوه‌سته به هه‌ر یه‌ك له ڕۆبیۆ و ڤانس و بۆرگۆم، به‌ڵام په‌له ناكات و به هێمنی ئه‌م بابه‌ته یه‌كلایی ده‌كاته‌وه.
هەڵبژاردنی سەرۆکایەتیی ئەمەریکا كه بڕیاره له 5ـی تشرینی یه‌كه‌می 2024، به‌ڕێوه بچێت، دەبێتە 60ـه‌مین هەڵبژاردنی سەرۆکایەتیی ئه‌و وڵاته.
ترەمپ ڕایگەیاند، سیناتۆر ڤانس شانبەشانی من دەجەنگێت و بەیەکەوە ئەمەریکا مەزن دەکەین.
ڤانس لە 2023 وەک ئەندامی ئەنجوومەنی پیرانی ئەمەریکا لە ویلایەتی ئۆهایۆ هەڵبژێردرا و تەمەنی 39 ساڵە.
پێشتر سیناتۆر ڤانس بە سەختی رەخنەی لە دۆناڵد ترەمپ دەگرت و بە هیتلەری ئەمەریکا ناوی دەبرد، بەڵام لە 2022 پشتیوانی خۆی بۆ ترەمپ ڕاگەیاند.