ترەمپ: شکستپێهێنانی هاریس ئاسانترە لە بایدن
K24 – هەولێر:
دۆناڵد ترەمپ لە یەکەم کاردانەوەی لەبارەی کشانەوەی جۆ بایدن لە کێبڕکێی هەڵبژاردنی سەرۆکایەتی ئەمەریکا، ڕایگەیاند: هەمووان دەیانزانی کە جۆ بایدن شیاو نییە وەک کاندیدای دیموکراتەکان دووبارە ببێتەوە بە سەرۆکی ئەمەریکا و دەشڵێت: شکستپێهێنانی هاریس ئاسانترە لە بایدن.
دۆناڵد ترەمپ، کاندیدای کۆمارییەکان بۆ هەڵبژاردنی سەرۆکایەتی ئەمەریکا لە یەکەم کاردانەوەیدا لەبارەی کشانەوەی بایدن بە کەناڵی سی ئێن ئێنی وڵاتەکەی ڕاگەیاندووە: بایدن خراپترین سەرۆکی ئەمەریکا بووە و لە داهاتووشدا، هەر ئاوا یادی دەکەنەوە.
ترەمپ ئاماژەی بەوەشکردووە: هەموو ئەوانەی لە دەوروبەری بایدن بوون بە پزیشکەکانیشیەوە، ئاگاداری دۆخی بایدن بوون و دەیانزانی شیاو نییە بچێتە کێبڕکێی هەڵبژاردنەوە.
ترەمپ باسی لەوەشکردووە: بۆ ماوەیەکی زۆر ئەمەریکا بەهۆی سیاسەتەکانی بایدنەوە دەناڵێنێت و لەبارەی هەڵبژاردنی کاماڵا هاریسیش ڕایگەیاند: شکستپێهێنانی هاریس ئاسانترە لە بایدن.