ڕاگەیەندراوی پێنتاگۆن لەبارەی کۆبوونەوەی هەردوو شاندی سەربازیی عێراق و ئەمەریکا
K24 - هەولێر:
شاندی باڵای سەربازیی عێراق و ئەمەریکا گفتوگۆ لەبارەی کۆتاییهاتن و گۆڕینی ئەرکی هاوپەیمانان دەکەن.
وەزارەتی بەرگری ئەمەریکا، ڕاگەیەندراوێکی لەبارەی کۆبوونەوەی شاندی سەربازی عێراق، کە نوێنەری پێشمەرگەش تێیدا ئامادەیە، لەگەڵ هێزەکانی ئەمەریکا بڵاوکردەوە و ئاماژەی بەوەدا، لیژنەی باڵای سەربازیی عێراق و ئەمەریکا بەدواداچوونی بۆ تواناکانی داعش کرد.
هاوکات لیژنەی باڵای سەربازیی ئەمەریکا و عێراق گفتوگۆیان لەبارەی توانا و هێزی سوپای عێراق کرد بۆ رووبەڕووبوونەوەی هەڕەشەکانی داعش لە عێراق و ناوچەکەدا.
لە ڕاگەیەندراوەکەی وەزارەتی بەرگری ئەمەریکا دا هاتووە، کۆبوونەوەی بەرپرسانی ئەمەریکا و عێراق لە پێنتاگۆن ڕەنگدانەوەی پابەندبوونی هەردوو وڵاتە بۆ پتەوکردنی پەیوەندیی تەناهیی دووقۆڵی لەسەر بنەمای کارەکانی لیژنەی باڵای سەربازیی ئەمەریکا و عێراق لە چەند مانگی ڕابردوودا و وەک ڕێزلێنانێکە بۆ یادی 10 ساڵەی ئەرکی سەربازی هاوپەیمان لە عێراق.
