سەرۆکی پەرلەمانی هەرێمی بادنی ئەڵمانیا ستایشی حکوومەتی هەرێمی کوردستان دەکات بۆ حەواندنەوەی ئاوارە و پەنابەران
وەزیری ناوخۆی حکوومەتی هەرێمی کوردستان لەگەڵ موحتەرەم ئاراز سەرۆکی پەرلەمانی هەرێمی بادن ڤیتنبێرگی ئەڵمانیا کۆبووەوە و سوپاسی ئەڵمانیای کرد لە هاوکاریی مرۆیی و سەربازیی بۆ هەرێمی کوردستان لە شەڕی دژی داعش، سەرۆکی پەرلەمانی هەرێمی بادن ڤێتنبێرکیش ستایشی حکومەتی هەرێمی کوردستانی کرد بەرامبەر پێشکەشکردنی هاوکاریی و حەواندنەوی ژمارەیەکی زۆری ئاوارە و پەنابەران.
دووشەممە 5ـی ئابی 2024، ڕێبەر ئەحمەد وەزیری ناوخۆی حکومەتی هەرێمی کوردستان، لە چوارچێوەی سەردانەکەیدا بۆ ئەڵمانیا ، لەگەڵ موحتەرەم ئاراز سەرۆکی پەرلەمانی هەرێمی بادن ڤیتنبێرگی ئەڵمانیا کۆبووەوە .
بەپێی ڕاگەیەندراوێکی ئەو وەزارەتە، لەو کۆبوونەوەیەدا وەزیری ناوخۆ بە ناوی حکومەتی هەرێمی کوردستان سوپاسی حکومەت و گەلی ئەڵمانیا ی کرد بۆ هاوکاری مرۆیی و سەربازیی هەرێمی کوردستان لە شەڕی دژی داعش، بەتایبەت هەرێمی بادن ڤێتنبێرک لە پشتگیریی بەردەوامیان بۆ ئاوارە و پەنابەران و هێنانی ژمارەیەکی ئافرەت ومنداڵی لێقەوماوانی ئیزیدی لە کوردستانەوە بۆ ئەڵمانیا.
ڕاگەیەندراوەکە ئاماژەی بەوە کردووە، سەرۆکی پەرلەمانی هەرێمی بادن ڤێتنبێرک ستایشی حکومەتی هەرێمی کوردستانی کرد بەرامبەر پێشکەشکردنی هاوکاریی و حەواندنەوی ژمارەیەکی زۆری ئاوارە و پەنابەران و داکۆکیکردن لە چەسپاندنی بەهاكانی پێکەوەژیانی نەتەوەیی و ئایینی لە ھەرێمی کوردستان.
بەهێزکردنی پەیوەندییە دوو قۆڵییەکان لە نێوان هەردوو هەرێم لە ڕووی ئەمنی و کولتووری و گرنگیی بەردەوامی هاوکاریی مرۆیی و هەوڵی هاوبەش بۆ رێگریکردن لە کۆچی نایاسایی، تەوەرێکی دیکەی گفتوگۆکانی کۆبوونەوەکە بوو.
