تره‌مپ: ده‌كرێت په‌یوه‌ندییه‌كی باشمان له‌گه‌ڵ ئێران هه‌بێت
سەرۆکی پێشووی ئەمه‌ریکا و کاندیدی کۆمارییەکان بۆ دووباره وه‌رگرتنه‌وه‌ی پۆستی سه‌رۆكی ئه‌مه‌ریكا، خواستی خۆی بۆ پێکهێنانی پەیوەندییەکی باش لەگەڵ ئێران دەرده‌بڕێت.
دۆناڵد ترەمپ، سەرۆکی پێشووی ئەمریکا و کاندیدی کۆمارییەکان بۆ دووباره وه‌رگرتنه‌وه‌ی پۆستی سه‌رۆكی ئه‌مه‌ریكا، خواستی خۆی بۆ پێکهێنانی پەیوەندییەکی باش لەگەڵ ئێران دەرده‌بڕێت.
تره‌مپ گوتوویه‌تی، نامەوێت پەیوەندیمان لەگەڵ ئێران خراپ بێت، هیوادارم پەیوەندی دۆستانەمان لەگەڵ ئێران هەبێت، ئاماژەی بەوەش کردووه ده‌كرێت ئه‌م ئه‌گه‌ره ڕوو بدات.
تره‌مپ هه‌روه‌ها ئاماژەی بەوەش کردووه، ئێران "ناتوانێت چەکی ئەتۆمی هەبێت" وەک مەرجێک بۆ پەیوەندییەکی باش لەگەڵ ئەمه‌ریکا.
پەیوەندی نێوان تاران و واشنتن لە سەردەمی ترەمپدا به دۆخێكی هه‌ستیار و ناخۆشدا تێپه‌ڕی، به‌تایبه‌تی كه تره‌مپ کشانەوەی وڵاته‌كه‌ی لە ڕێککەوتنی ئەتۆمی لەگەڵ ئێران ڕاگەیاند و هەروەها فەرمانی كوشتنی قاسم سولەیمانی، فەرماندەی سوپای قودسی سوپای پاسدارانی ئێرانی دەرکرد.
لێدوانەکانی ترامپ تاڕادەیەک لەگەڵ بەرنامە و پلانەکانی مەسعوود پزیشكیان، سەرۆککۆماری نوێی ئێران و تێڕوانینەکانی پێشوەختەی سەبارەت بە چۆنیەتی بەڕێوەبردنی وڵات یەک دەگرێتەوە.