کوردستان24 وادەی ساڵی نوێی خوێندنی زانکۆکانی هەرێمی کوردستان ئاشکرا دەکات
لە سەرەتای مانگی داهاتوو، ساڵی نوێی خوێندنی 2024-2025 لە زانکۆ و پەیمانگاکانی هەرێمی کوردستان دەست پێ دەکات. لە بەشێک زانکۆکانیش دەست بە دابەشکردنی بەشە ناوخۆییەکان کراوە.
زانکۆی سەڵاحەددین
چوارشەممە، 21-08-2024، د. کامەران یونس، سەرۆکی زانکۆی سەڵاحەددین بە کوردستان24ـی ڕاگەیاند، ڕۆژی 02-09-2024، وەکو دەستپێکی ساڵی نوێی خوێندنی 2024-2025 لە زانکۆکەیان پێشنیاز کراوە، بەڵام ئەو وادەیە تاوەکو ئێستا بە شێوەیەکی فەرمی لەلایەن ئەنجوومەنی زانکۆکەوە پەسەند نەکراوە.
وەکو ئەوەی سەرۆکی زانکۆی سەڵاحەددین باسی کرد، ستافی ئەکادیمیی زانکۆ ڕۆژێک پێش دەستپێکردنی دەوامی قوتابییان دەست بە کار دەبن و هەفتەیەکیش پێش دەستپێکردنی دەوامی فەرمی، بەشە ناوخۆییەکان بەسەر قوتابییاندا دابەش دەکەن.
زانکۆی دهۆک
چوارشەممە، 21-08-2024، د. داود ئەترووشی، سەرۆکی زانکۆی دهۆک بە کوردستان24ـی ڕاگەیاند، 02-09-2024، ساڵی نوێی خوێندنی 2024- 2025 لە زانکۆکەیان دەست پێ دەکات، ڕۆژێک پێشتریش، ستافی ئەکادیمی زانکۆ دەست بە دەوام دەکات.
بە گوتەی سەرۆکی زانکۆی دهۆک، چەند ڕۆژێک پێش دەستپێکردنی ساڵی نوێی خوێندن لە زانکۆکە، بەشی ناوخۆیی بەسەر قوتابییاندا دابەش دەکرێن، ئەو بەشە ناوخۆییانەی دەکەونە نێو حەرەم (کەمپەس)ـی زانکۆ، بە قوتابییانی کچ دەدرێن و ئەوانەی دەکەونە نێو شاریش، بە قوتابییانی کوڕ دەدرێن.
زانکۆی زاخۆ
د. رەمەزان جەعفەر، جێگری سەرۆکی زانکۆی زاخۆ بۆ کارووباری قوتابییان بە کوردستان24ـی گوت، "ڕۆژی 10-09-2024، دەوامی ساڵی نوێی خوێندنی زانکۆکەمان دەست پێ دەکات، هەفتەیەکیش پێش ئەو وادەیە تەواوی بەشە ناوخۆییەکان بەسەر قوتابییاندا دابەش دەکەین".
هەفتەی یەکەمی ساڵی نوێی خوێندن لە زانکۆی زاخۆ تایبەت دەبێت بە تۆمارکردنی ناوی قوتابییان لە سیستەمی پۆلۆنی کە چەند ساڵێکە لە ژمارەیەک زانکۆی هەرێمی کوردستان پەیڕەو دەکرێت.
زانکۆی سۆران
ڕێبەر عەبدولغەفار عەزیز، بەرپرسی ڕاگەیاندنی زانکۆی سۆران، بە کوردستان24ـی گوت، سەرەتای مانگی داهاتوو، (01-09-2024) ساڵی نوێی خوێندنی 2024-2025 لەو زانکۆیە دەست پێ دەکات.
بە گوتەی بەرپرسی ڕاگەیاندنی زانکۆی سۆران، لە 15ـی ئەم مانگەوە دەست کراوە بە دابەشکردنی بەشە ناوخۆییەکان بەسەر قوتابییاندا و پرۆسەکە تاوەکو 31-08-2024 بەردەوام دەبێت.
زانکۆی هەڵەبجە
هەرێم محەممەد، بەرپرسی ڕاگەیاندنی زانکۆی هەڵەبجە لەبارەی دەستپێکردنی ساڵی نوێی خوێندن لە زانکۆکەیان بە کوردستان24ـی ڕاگەیاند، تاوەکو ئێستا بە فەرمی وادەکە دەستنیشان نەکراوە، چونکە ئێستا سەرقاڵی گۆڕانکاریین لە چەند پۆستێکی کارگێڕییدا.
بەرپرسی ڕاگەیاندنی زانکۆی هەڵەبجە پێشبینی دەکات، ساڵی نوێی خوێندن لە زانکۆکەیان بکەوێتە نێوان 01 بۆ 03ـی سەرەتای مانگی داهاتوو.
زانکۆی سلێمانی
بە گوێرەی بەدواداچوونێکی کوردستان24، تاوەکو ئێستا بە فەرمی وادەی ساڵی نوێی خوێندنی 2024-2025 لە زانکۆی سلێمانی دەستنیشان نەکراوە، بەڵام پێشنیاز بۆ ئەنجوومەنی زانکۆکە کراوە، ساڵی نوێی خوێندن لە ماوەی نێوان 05 بۆ 10-09-2024 دەست پێ بکات.