ئەمەریکا: بۆ بنیادنانی هێزێکی نیشتمانی تۆکمە بۆ کوردستان هاوکار دەبین

فەرماندەی گشتیی هێزەکانی هاوپەیمانان لە عێراق ڕایدەگەیەنێت: بۆ بنیادنانی هێزێکی نیشتمانی تۆکمە بۆ کوردستان هاوکار دەبن، دەڵێت: پرۆسەی چاکسازیی بگەیەننە دەرئەنجامی گرنگ و پێویست لە وەزارەتی پێشمەرگەدا.

چوارشەممە 21ـی ئابی 2024، وەزارەتی پێشمەرگە بڵاوی کردەوە، شۆڕش ئیسماعیل وەزیری پێشمەرگە، پێشوازی لە جەنەراڵ هـام، فەرماندەی گشتیی ڕاوێژکارانی سەربازیی هاوپەیمانان لە عێراق و شاندێکی یاوەری کرد.

بەپێی ڕاگەیەندراوی وەزارەتی پێشمەرگە، لەو کۆبوونەوەیەدا کە عەبدولخالق بابیری بریکاری وەزارەت و ئەفسەرانی پلە باڵای وەزارەتەکە ئامادەیبوون، وەزیری پێشمەرگە باسی پرس و پرۆسەی چاکسازیی کرد لە وەزارەتی پێشمەرگە و رایگەیاند:  چاکسازیی پرۆسەیەکی حەتمییە، لەم پێناوەدا بەردەوامین لە ڕێکخستنەوە و یەکخستنەوەی هێزەکانی پێشمەرگە و بنیادنانی فیرقە و دەڤەر لە چوارچێوەی وەزارەتی پێشمەرگەدا بە هاوکاریی و هەماهەنگی راوێژکاران و دیپلۆماتکارانی هاوپەیمانان لە هەرێمی کوردستان و عێراقدا.

هەروەها وەزیری پێشمەرگە ستایشی هەوڵەکانی راوێژکارانی سەربازیی هاوپەیمانانی کرد و ڕۆڵی ئەوانی بەرز نرخاند لە بەرەنگاربوونەوەی تیرۆر و پاراستن و سەقامگیری هەرێمی کوردستان و پرۆسەی چاکسازیی لە وەزارەتی پێشمەرگە.

لە بەرامبەردا جەنەڕاڵ هام، فەرماندەی گشتیی هێزەکانی هاوپەیمانان لە عێراق پاڵپشتی و پشتیوانیی هێزەکانی هاوپەیمانی نێودەوڵەتی بۆ وەزارەتی پێشمەرگە دووپات کردەوە و ڕایگەیاند: لە بنیادنانی هێزێکی نیشتمانی تۆکمە بۆ کوردستان هاوکار دەبین و ئومێدمان وایە پرۆسەی چاکسازیی بگاتە دەرئەنجامی گرنگ و پێویست لە وەزارەتی پێشمەرگەدا.