ئه‌فغانستان؛ تاڵیبان شكاندن و سووتاندنی پتر له 20 هه‌زار ئامێری مۆسیقا ڕاده‌گه‌یه‌نێت
به‌رپرسانی حكوومه‌تی تاڵیبانی ئه‌فغانی ئاماژه به‌وه ده‌كه‌ن، له ماوه‌ی ساڵێكدا زیاتر له 20 هه‌زار ئامێری مۆسیقایان شكاندووه و سووتاندووه و له‌ناو بردووه.
چوارشه‌ممه، 21ـی ئابی 2024، به‌رپرسانی وه‌زاره‌تی "ئه‌مر به چاكه و نه‌هی له خراپه"ـی حكوومه‌تی تاڵیبانی ئه‌فغانی، ڕایانگه‌یاند، وه‌كوو ئه‌ركی ساڵانه، له ماوه‌ی ساڵی ڕابردوودا 21 هه‌زار ئامێری مۆسیقایان له‌ناو بردووه.
به‌رپرسانی وه‌زاره‌تی "ئه‌مر به چاكه و نه‌هی له خراپه" له حكوومه‌تی تاڵیبان ئاماژه‌یان به‌وه كردووه، ئه‌و هه‌ڵمه‌ته له دژی ئه‌و كارانه‌یه كه "دژی ئیسلامن"
هاوكات پۆلیسی ڕه‌وشت له ئه‌فغانستان هانی خه‌ڵكی ئه‌و وڵاته‌ی داوه له بۆنه و ئاهه‌نگه‌كاندا مۆسیقا به كار نه‌هێنن. ده‌شڵێت، هه‌زاران كاسێتی فیلمی به‌دڕه‌وشتیان له‌ناو بردووه و ده‌ستیان به‌سه‌ر ژماره‌یه‌كی زۆریش له كۆمپیوته‌ر كه‌سیدا گرتووه.
به‌رپرسانی وه‌زاره‌تی "ئه‌مر به چاكه و نه‌هی له خراپه" ڕوونیشیان كردووه‌ته‌وه، له‌وه‌ته‌ی تاڵیبان حوكمی ئه‌و وڵاته‌ی وه‌رگرتووه‌ته‌وه، توانیویانه به ڕێژه‌ی 90% چاكسازیی له ده‌زگه ڕاگه‌یاندنه‌كانی وڵاته‌كه‌یان بكه‌ن.