شەڕ و پێکدادان لەنێوان گرووپێکی حەشدی شەعبی و سوپای عێراق ڕووی دا
لە کەربەلا، گرووپێکی چەکداری سەر بە حەشدی شەعبی دەستڕێژ لە ئەندامانی سوپای عێراق دەکەن و دواتر هێزە ئەمنییەکان هەڵدەکوتنە سەر گرووپە و شەش کەسیان لێ دەستگیر دەکەن.
سەرچاوەیەکی ئەمنی لە وەزارەتی ناوخۆی عێراق ڕایگەیاند، شەوی ڕابردوو لە شاری کەربەلا، چەکدارانی گرووپی جوندی ئیمام، کە باڵێکی نێو ڕێکخراوەی حەشدی شەعبی عێراقە و لەلایەن ئەحمەد ئەسەدی، وەزیری کاری عێراق سەرپەرشتی دەکرێن، بەهۆی دەمەقاڵێوە لەگەڵ مەفرەزەیەکی سوپای عێراق تێکگیربوون و دواتر دەستڕێژیان لە ئەندامەکانی سوپای عێراق کردووە.
سەرچاوەکە ئاماژەی داوە، بۆ ئەوەی ئاڵۆزییەکان تەشەنە نەکات، هێزێکی تایبەتی وەزارەتی ناوخۆ و حەشدی شەعبی چوونەتە نێوەندگیری و کۆنترۆڵی دۆخەکەیان کردووە و شەش چەکداریان دەستگیر کردووە.
لە سەرەتای ئەم مانگەوە لە چوارچێوەی جێبەجێکردنی پلانی ئەمنی پاراستنی سەلامەتی زیارەتکارانی ناوخۆ و دەرەوەی وڵات، سوپای عێراق بە تەواوی پێکهاتەکەییەوە لە ناو شاری کەربەلا و دەوروبەری بڵاو کراونەتەوە و بازگەیان داناوە، لە هەندێک کاتی پێویستدا بە هەماهەنگیی لەگەڵ هێزەکانی سەر بە وەزارەتی ناوخۆ هەڵمەتی گەڕان و پشکینین شوێنە گوماناوییەکانیش دەکەن.
