کۆمپانیای لوفتهانزا گەشتەکانی بۆ هەولێر دەست پێدەکاتەوە
K24 – هەولێر:
کۆمپانیای لوفتهانزای ئەڵمانی ڕایگەیاند: گەشتەکانیان بۆ فڕۆکەخانەی نێودەوڵەتیی هەولێر لە 27ـی ئەم مانگەوە دەست پێدەکاتەوە.
23ـی ئابی 2024، کۆمپانیای لوفتهانزای ڕایگەیاند: گەشتە ئاسمانییەکانی بۆ فڕۆکەخانەی نێودەوڵەتیی هەولێر لە 27ـی ئەم مانگەوە دەست پێدەکات.
هەروەها کۆمپانیاکە ڕایگەیاندووە: هەڵپەساردنی گەشتەکانی بۆ لوبنان تاوەکوو 30ـی ئەم مانگە درێژکردووەتەوە، هەروەها تاوەکوو 2ـی ئەیلوولی 2024ـی گەشتەکانی بۆ تاران و تەلئەڤیڤ هەڵپەساردووە.
ئەمەش لە کاتێکدایە، ئەو کۆمپانیایە درێژکردنەوەی ڕاگرتنی گەشتەکانی لە پێناو پاراستی سەلامەتیی تیمی فڕۆکەوانییەکان و گەشتیاران کە بەهۆی ناکۆکی و ململانێکانی ناوچەکە بە تایبەت ئیسرائیل لەگەڵ ئێران و لوبنان بۆ چەندین جار درێژکردەوە.
سوپای پاسدارانی ئێران، بەڵێنی تۆڵەسەندنەوەی خوێنی ئیسماعیل هەنییە سەرۆکی مەکتەبی سیاسیی بزووتنەوەی حەماسی داوە، کە ڕۆژی 31 مانگی ڕابردوو دوای بەشداربوونی لە ڕێوڕەسمی سوێندخواردن و دەستبەکاربوونی مەسعود پزیشکیان سەرۆککۆماری نوێی ئێران، هەنییە و پاسەوانە تایبەتەکەی ناوجەرگەی تاران لە هێرشێکدا کوژران و دواتر ئیسرائیل بەرپرسیارێتی هێرشەکەی گرتە ئەستۆ.
