زانا مه‌لا خالید: یه‌كێتی به بڕیاره‌كانی سه‌رۆكوه‌زیران مه‌سرور بارزانی تووشی هیستریا بووه
سه‌رۆكی فراكسیۆنی پارتی دیموكراتی كوردستان له خولی پێنجه‌می په‌رله‌مانی كوردستان، ئاماژه به‌وه ده‌كات، یه‌كێتی به‌و ڕێژه كه‌مه‌ی كورسییه‌كانی كه له 2018 به ده‌ستی هێناوه، شیاوی ئه‌وه نه‌بوو شه‌ش وه‌زاره‌تی له حكوومه‌ت هه‌بێت؛ ده‌شڵێت، یه‌كێتی به بڕیاره‌كه‌ی سه‌رۆكوه‌زیران مه‌سرور بارزانی بۆ به‌گرێبه‌ستكردنی 38 هه‌زار مامۆستای وانه‌بێژ، تووشی هیستریا بووه.
سێشه‌ممه، 27ـی ئابی 2024، زانا مه‌لا خالید، سه‌رۆكی فراكسیۆنی پارتی دیموكراتی كوردستان له خولی پێنجه‌می په‌رله‌مانی كوردستان، تایبه‌ت به كوردستان24 گوتی، ڕاگه‌یه‌ندراوه‌كانی یه‌كێتی وه‌ك دروستبوونی خودی حزبه‌كه بێبنه‌مایه و حزبێك به‌م شێوه‌یه دروست بووبێت، ئاساییه ڕاگه‌یه‌ندراوه‌كانیشی به‌م شێوه‌یه گوزارشت له خۆی بكات.
زانا مه‌لا خالید ئاماژه‌ی به‌وه‌ش كرد، به‌شداریی یه‌كێتی له كابینه‌ی نۆیه‌مدا، به‌شدارییه‌كی شه‌رمنانه بووه، به‌و مانایه‌ی هه‌موو پۆسته‌كانی بۆ ڕازیكردنی باڵه جیاوازه‌كانی ناو ئه‌و حزبه دابه‌ش كردووه. هاوكات یه‌كێتی له كابینه‌ی نۆیه‌مدا وه‌كوو ئۆپۆزسیۆنێكی ناته‌ندروست مامه‌ڵه‌ی له‌گه‌ڵ حكوومه‌تی هه‌رێمی كوردستان و كه‌سیی سه‌رۆكوه‌زیران مه‌سرور بارزانی كردووه.
ناوبراو باسی له‌وه‌ش كرد، یه‌كێتی به‌و ڕێژه كه‌مه‌ی كورسییه‌كانی كه له 2018 به ده‌ستی هێناوه، شیاوی ئه‌وه نه‌بوو شه‌ش وه‌زاره‌تی له حكوومه‌ت هه‌بێت و خاوه‌نی سه‌رۆكی په‌رله‌مان بێت و جێگری سه‌رۆكی هه‌رێمی پێ بدرێت.
سه‌رۆكی فراكسیۆنی پارتی دیموكراتی كوردستان له خولی پێنجه‌می په‌رله‌مانی كوردستان هێمای بۆ ئه‌وه‌ش كرد، ئه‌وه‌ی یه‌كێتی له دژی سه‌رۆكوه‌زیران مه‌سرور بارزانی ده‌ستی پێ كردووه، درێژه‌پێده‌ری هه‌موو ئه‌و پیلانانه‌یه كه له‌وه‌ته‌ی كابینه‌ی نۆیه‌می دژی سه‌رۆكوه‌زیران ده‌كرێت.
زانا مه‌لا خالید سه‌رنجی بۆ ئه‌وه ڕاكێشا، یه‌كێتی به بڕیاره‌كه‌ی سه‌رۆكوه‌زیران مه‌سرور بارزانی بۆ به‌گرێبه‌ستكردنی 38 هه‌زار مامۆستای وانه‌بێژ، تووشی هیستریا بووه، چونكه له‌مه‌ودوا ناتوانن شه‌قامی مامۆستایان به ئاره‌زووی خۆیان ئاراسته بكه‌ن.
زانا مه‌لا خالید ڕوونی كرده‌وه، سه‌رۆك بارزانی به‌رده‌وام جه‌ختی له یه‌كڕیزی ناوخۆیی كردووه‌ته‌وه و به پێویستی زانیوه هه‌موو ڕه‌نگ و ده‌نگه جیاوازه‌كان هاوبه‌شێكی ڕاسته‌قینه بن له حوكمڕانیدان. یه‌كێتی له به‌رانبه‌ردا به‌رده‌وام ویستوویه‌تی له‌ناو حكوومه‌ت بێت و له ده‌ره‌وه‌یش ده‌ستگێڕی بۆ نه‌یارانی هه‌رێمی كوردستان و پارتی و مه‌سرور بارزانی ده‌كات.
سه‌رۆكی فراكسیۆنی پارتی دیموكراتی كوردستان له خولی پێنجه‌می په‌رله‌مانی كوردستان تیشكی خسته سه‌ر ئه‌وه‌ی سه‌رۆكوه‌زیران مه‌سرور بارزانی به دیگه‌یه‌كی گه‌وره و فره‌وان بڕیار ده‌دات كه هه‌موو بڕیاره‌كانیشی بۆ سه‌رجه‌م خه‌ڵك و پێكهاته و چینوتوێژ و ڕه‌نگ و ده‌نگه جیاوازه‌كانی كوردستانه، بۆ نموونه بڕیاری به‌گرێبه‌ستكردنی مامۆستایانی وانه‌بێژ، كه به ته‌نیا پارتی نه‌بوون، به‌ڵكوو هی هه‌موو لایه‌ن و بێلایه‌نه‌كان بوون.
سێشەممە 27ـی ئابی 2024، مەحموود محەممەد، گوتەبێژی پارتی دیموکراتی کوردستان، ڕاگەیەندراوێکی لەبارەی "هەڵوێستى نەیارانە و قین لە دڵانە و چەواشەکارى و هەواڵى بێ بنەما"ـی بەشێک لە بەرپرس و مێدیاکانى یەکێتیى نیشتمانیى کوردستان لە دژی مەسرور بارزانی، جێگری سەرۆکی پارتی و سەرۆکی حکوومەتی هەرێمی کوردستان بڵاو کردەوە.
مەسرور بارزانى، وەکو ئەوەی لە ڕاگەیەندراوەکەدا هاتووە "کار و هەڵوێست و بۆچوون و سیاسەتەکانى لە حوکمڕانى و کارى سیاسیدا لە چوارچێوەى بەرنامە و هەڵوێستى پارتى دیموکراتى کوردستانە و هەر جۆرە تەجاوزێک بۆ سەر کەسێتىی مەسرور بارزانى، بەلاى پارتى و پارتییەکانەوە تەجاوزە بۆ سەر سەرجەم پارتییەکان و جەماوەرى بەهەڵوێستى پارتى".
مەحموود محەممەد دەڵێت: ئێمە لە پارتى دیموکراتى کوردستان، بۆ ڕاى گشتى و خەڵکى خۆشەویستى کوردستان دووپاتى دەکەینەوە، نووسەران و هاندەرانى پشت ئەو ڕاگەیاندراوەى یەکێتى، لە ڕوانگەى دۆخى باڵباڵێنى ناو خودى خۆیانەوە، دەیانەوێت وێناى پارتیمان بکەن! پارتیمان خاوەن ڕێبازێکى ڕاست و دروست و خاوەن ڕابەر و مەرجەعێکە کە سەرۆک (مەسعود بارزانى)یە و هەموومان ڕێبوار و خەباتگێڕى ڕێبازى بارزانین و لە سایە و چەترى جەنابى سەرۆک بارزانیدا بۆ یەک ئامانج و یەک ڕێباز تێدەکۆشین".