سەرۆککۆماری ئیسلامیی ئێران گەیشتە بەغدا
سەرۆککۆماری ئیسلامییی ئێران گەیشتە بەغدا و بڕیارە سبەینێ سەردانی هەرێمی کوردستانیش بکات.
ئەمڕۆ چوارشەممە، 11-09-2024، نووسینگەی ڕاگەیاندنی سەرۆکوەزیرانی عێراق بڵاوی کردەوە، محەممەد شیاع سوودانی، سەرۆکوەزیرانی فیدراڵ، پێشوازی لە مەسعود پزیشکیان، سەرۆکی کۆماری ئیسلامی ئێران کرد.
سەرۆککۆماری ئیسلامی ئێران سەردانی ژمارەیەک پارێزگای شیعەنشینی عێراق و مەزارگە دەکات. هەروەها بڕیارە سبەی پێنجشەممە، 12-09-2024 بگاتە هەرێمی کوردستان.
چاوەڕێ دەکرێت پزیشکیان ژمارەیەک یاداشتنامەی ئەمنی لەگەڵ بەرپرسانی عێراق واژۆ بکات. پێشتر سەرۆککۆماری ئیسلامی ئێران گوتبووی، دەیەوێت کارە لە پێشینەکانی بەهێزکردنی پەیوەندییەکان بێت لەگەڵ وڵاتانی دراوسێ.
سەرۆککۆماری ئێران، بەرلەوەی بەرەو بەغدا بەڕێ بکەوێت، لە فڕۆکەخانە، لە لێدوانێکی ڕۆژنامەوانیدا ڕایگەیاند، لە سەردانەکەی بۆ عێراق، سەردانی "پارێزگا شیعەنشینەکان و شارە کوردنشینەکان دەکەین".
