قایمقامی هەولێر: نرخی پێداویستییە سەرەکییەکانی ڕۆژانەی هاووڵاتییان هەرزانتر بووە
قایمقامی هەولێر ڕایگەیاند، بە هۆی سەقامگیری و جموجۆڵی بازرگانەکان، نرخی پێداویستییە سەرەکییەکانی هاووڵاتییان هەرزانتر بووە.
ئەمڕۆ شەممە، 14ـی ئەیلوولی 2024، نەبەز عەبدولحەمید، قایمقامی قەزای ناوەندیی هەولێر، بە کوردستان24ـی ڕاگەیاند، بەگشتیی، نرخی هەموو پێداویستییەکانی ڕۆژانەی هاووڵاتییان هەرزانتر دەبن، چونکە ئێستە بازاڕ سەقامگیرە.
قایمقام دەڵێت: ئەو جوڵە بازرگانییەی بازرگانەکان کە ئێستە هەیە کاریگەری لەسەر هەرزانیی نرخی پێداویستییەکان هەیە، بە وردی ناتوانین بڵەین کامە و کامە نرخی هەرزانبووە یاخود هەرزان دەبێت، بەڵام بە گشتیی پێداویستییە سەرەکییەکانی کەلوپەل و خۆراک ئێستە نرخەکانیان جێگیرە، پێداویستییەکانی دیکەش نرخەکانیان هەرزان دەبێت.
نەبەز عەبدولحەمید گوتیشی: وەکو خۆمان بەردەوام چاودێری بازاڕ دەکەین و ئاگادارین لە نرخی کەلوپەلەکان، بۆنموونە نرخی گۆشت لە ماوەکانی ڕابردوودا گەیشتبووە زیاتر لە 20 هەزار دینار، ئیستە نرخەکەی 18 هەزار دینارە و لە داهاتووشدا نرخەکەی دەبێتە 14 هەزار دینار.