بەڕێوبەرایەتیی گشتیی تەندروستیی کۆیە: سێ حاڵەتی توشبوون بە کۆلێرا لە سنووره‌كه‌مان تۆمار کران
شه‌ممه، 14ـی ئه‌یلوولی 2024، بەڕێوبەرایەتیی گشتیی تەندروستیی کۆیە هۆشداریی دەداتە هاووڵاتییان کە سێ حاڵەتی نەخۆشی کۆلێرا لە سنوورەکەیان تۆمار کراوە.
بەڕێوبەرایەتیی گشتیی تەندروستیی کۆیە ئاماژه‌ی به‌وه كردووه، حاڵەتەکان یەکێکیان لە قەزای کۆیە و دووانی دیكه‌یان لە ناحیەی تەقتەق بووه.
بەڕێوبەرایەتیی گشتیی تەندروستیی کۆیە داوای له هاووڵاتییان كردووه، ڕێکارەکانی خۆپارێزی بە باشیی جێبەجێ بکەن، به‌تایبه‌تی: ڕاگرتنی پاکوخاوێنی کەسیی، دڵنیابوونەوە لە پاکیی سەرچاوەی ئاو، ئاگاداربوون لە خواردنی سەوزە و میوە و باش شۆردنەوەیان پێش خواردنیان و خۆ به‌دوورگرتن لە خواردنی دەرەوە و سەردانەپۆشراو.
به‌ڕێوه‌به‌رایه‌تیی ناوبراو داواشی كردووه لە کاتی بوونی حاڵەتی سکچوونی توند، سەردانی نەخۆشخانە بکەن. ده‌شڵێت، تیمەکانی تەندروستی بە بەردەوامیی لە ئەرکدا دەبن و پشکنین بۆ سەرچاوەی ئاو و شوێنکار و خواردنگە و جێگە گومانلێکراوەکان دەکەن، بەمەبەستی دڵنیابوونەوە لە بڵاونەبوونەوەی نەخۆشییەکە.