سیاسی

گوتەبێژی بارەگای بارزانی: پێشمەرگە هێزێکی ڕێکخراوە، نەک تائیفی

خالیدە خەلیل، گوتەبێژی بارەگای بارزانی
خالیدە خەلیل، گوتەبێژی بارەگای بارزانی
کوردستان بارەگای بارزانی حەلبووسی پێشمەرگە

گوتەبێژی بارەگای بارزانی رایگەیاند "پێشمەرگە هێزێکی ڕێکخراوە، نەک هێزێکی تائیفی تاوەکوو دژی پڕچەکردنی بن".

خالیدە خەلیل، گوتەبێژی بارەگای بارزانی لە پۆستێکدا لە تۆڕی کۆمەڵایەتیی ئێکس ڕایگەیاند "پێشمەرگە هێزێکی ڕێکخراوە و لە سەردەمێکی پێویستدا بۆ بەرگریی لە ژیانێکی شکۆمەندانە و خاکی کوردستان هاتووەتە کایەوە".

بە گوتەی گوتەبێژی بارەگای بارزانی "پێشمەرگە دژی یەکێک لە دڕندەترین ڕێکخراوەکان کە داعش بوو، جەنگا و شەهیدی دا، هێزێکی ڕێکخراوە نەک هێزێکی تائیفی بێت تا دژی پڕچەککردنی بوەستنەوە".

وەکو ئەوەی خالیدە خەلیل لە بەشێکی دیکەی پۆستەکەیدا ئاماژەی پێ کردووە "پێشمەرگە هێمای ئاسایش، سەقامگیریی و ئاشتییە".

ئەمە لە کاتێکدایە، دژایەتیکردنی کورد، ئەو دروشمەی سیاسییەکانی عێراق بیانەوێت پۆستێک یاخود دەستکەوتێک بەدەست بهێنن پەنای بۆ دەبەن و لەو ڕێگەیەوە هەوڵی وەدەستهێنانی دەدەن.

 

 

 

 

حەلبووسی بۆ مەبەستێکی سیاسی دژایەتیی پڕچەککردنی پێشمەرگە دەکات

محەممەد حەلبووسی، دیارترین نموونەی ئەم دیاردەیە لەناو ژینگەی سیاسیی عێراقدا. حەلبووسی کە ماوەی 10 مانگە لە پۆستی سەرۆکی پەرلەمان لا دراوە و بەهۆی فرەجەمسەری و ناکۆکیی سوننەکانەوە نەتوانراوە کەسێک لەجێگەی دابنرێت، لە نوێترین هەڵوێستیدا دژایەتیی خۆی بۆ پڕچەککردنی پێشمەرگە دەردەبڕێت و داوا دەکات چەکی قورس و تۆپهاوێژیان پێ نەدرێت.

محەممەد حەلبووسی دەشڵێت: ڕەنگە ئەو چەکانەی بەهێزە ناوخۆییەکان دەدرێت لە ململانێی نێوخۆیدا بەکار بهێنرێن.

قسەکانی حەلبووسی دژی پێشمەرگە، ڕێگەیەکی نوێیە بۆ ئەوەی ناوبراو دڵی دژە کوردەکان بە دەست بهێنێت و پۆستی سەرۆکی پەرلەمان کە 10 مانگە بە وەکالەت بەڕێوە دەبرێت یەکلایی بکرێتەوە.

سەرۆکی هاوپەیمانیی تەقەدووم کە ڕۆژانە ئەندام پەرلەمانیان لێ هەڵدەوەرێت و درزی زیاتر دەکەوێتە ناو پێکهاتەی سووننە، لەم ڕێگەیەوە هەوڵ دەدات، سەرۆکایەتیی پەرلەمان بۆ حزبەکەی یەکلایی بکاتەوە و دەنگی شیعەکان بۆخۆی بەدەست بهێنێت.

پێشمەرگە، لە ماددەی 121ـی دەستووری عێراق وەک هێزێکی فەرمی و پارێزەری دەستوور ناوی هێنراوە، سەرباری ئەم ڕاستییە، محەممەد حەلبووسی دەیەوێت بە ڕاکێشانی سەرنجی ڕای گشتی بۆ لای پڕچەککردنی هێزی پێشمەرگە لەلایەن هاوپەیمانی نێودەوڵەتیەوە، وەک هێزێکی کاریگەری لەشەڕی دژی داعش پێگەی خۆی لای لایەنە شیعییەکان بەهێز بکات.

 لە کاتێکدا هێشتا سوننەکان لە مانگی یازدەی ساڵی ڕابردووەوە نەیانتوانیوە لەسەر کاندیدێکی هاوبەش بۆ سەرۆکی پەرلەمانی عێراق ڕێک بکەون، ئەمەش ڕێگەی خۆش کردووە تا شیعەکان بە ئاسانی دەست بخەنە کاروبارەکانیانەوە و هەژموونی خۆیان بسەپێنن و ئەو یاسایانە تێپەڕێنن کە خۆیان دەیانەوێت.

ململانێی سەرۆکایەتیی پەرلەمانی عێراق دوای کشانەوەی شەعلان کرەیم، لە نێوان سالم عیساوی و مەحموود مەشهەدانی چڕ بووەتەوە، بۆ لەزەویدانی ڕکەبەرەکەشیان هەریەک لەم کاندیدانە پەنایان بۆ هێزە شیعەکان بردووە تا تەرازوی هێز بەلای خۆیاندا لاسەنگ بکەن.