قایمقامی ڕواندز: سەرەڕای قەیران، حکوومەتی هەرێم بەردەوام بووە لە خزمەتکردنی ناوچەکان
قایمقامی ڕواندز ڕایگەیاند، سەرەڕای هەبوونی قەیران، حکوومەتی هەرێمی کوردستان بەردەوام بووە لە گەیاندنی پرۆژە خزمەتگوزاریەکانی ئاو، ڕێگەوبان و کارەبا، کە ڕاستەوخۆ پەیوەندی بە ژیانی هاووڵاتییانەوە هەبووە.
پێنج شەممە، 19ـی ئەیلوولی 2024، ئەحمەد قادر، قایمقامی ڕواندز، بە کوردستان24ـی ڕاگەیاند، لە چوارچێوەی کارەکانی کابینەی نۆیەمی حکوومەتی هەرێمی کوردستان و ڕاسپاردەکانی سەرۆک وەزیران ئەولەویەتی کارەکانمان گەیاندنی خزمەتگوزارییەکانە بۆ هەموو ئەو شوێنانەی کە بە هۆی قەیرانە یەک لە دوای یەکەکان نەتوانراوە خزمەتگوزارییان پێ بگات.
ئەو قایمقامە دەڵێت: کابینەی نۆیەمی حکوومەتی هەرێمی کوردستان سەرەڕای ئەو قەیرانە داراییەی کوردستانی گرتەوە بەردەوام بووە لە گەیاندنی پرۆژە خزمەتگوزاریەکانی ئاو ڕێگەوبان و کارەبا، کە ڕاستەوخۆ پەیوەندی بە ژیانی هاووڵاتییانەوە هەیە، بەتایبەتیش دوای دروستبوونی ئیدارەی سەربەخۆی سۆران و پاڵپشتی ئیدارە بۆ جێبەجێکردنی پرۆژەکان.
قایمقامی ڕواندز دەشڵێت: ئێمە توانیومانە خزمەتگوزاری باش پێشکەش و جێبەجێ بکەین و پشکی شێریش زیاتر بە گوندەکان بکەوێت، ئەویش زیاتر بە گەیاندنی ڕێگەوبانی گوندەکان بۆ ئەوەی گوندەکان زیاتر ببوژێنەوە و بایەخی زیاترییان پێ بدرێت تاکوو ببنە سەرچاوەی داهات و هەلی کار بۆ هاونیشتیمانیان دابین بکەن و زیاتر ئاوەدان ببنەوە.
ئاماژەی بەوەش دا، ڕێگەوبانەکان بوونەتە کاری سەرەکیی ئێمە، ئەمساڵ لە دۆڵی ئاکۆیان کۆمەڵێک پرۆژەی ڕێگەوبان و نۆژەنکردنەوەیانمان خستە واری جێبەجێ کردن، لەگەڵ کۆنکریتکردنی شەقامەکان، لە پلانیشماندا هەیە کار لەسەر کۆنکرێتکردنی شەقامە ناوخۆییەکانی وەرتێ و گوندەکانیش بکەین.