ئەحمەد ئەنوەر: کابینەی نۆیەم هەنگاوی جیددی بۆ ڕووبەڕووبوونەوەی گەندەڵی ناوە
سه‌رۆكی ده‌سته‌ی ده‌ستپاكیی هه‌رێمی كوردستان ئاماژه به‌وه ده‌كات، له كابینه‌ی نۆیه‌مدا چاودێریی ناوخۆیی به‌هێز كرا بۆ به‌دواداچوون و چاودێریكردنی داموده‌زگه‌كانی حكوومه‌ت.
دووشه‌ممه، 23ـی ئه‌یلوولی 2024، ئه‌حمه‌د ئه‌نوه‌ر، سه‌رۆكی ده‌سته‌ی ده‌ستپاكیی هه‌رێمی كوردستان تایبه‌ت به كوردستان24 گوتی: كابینه‌ی نۆیه‌می حكوومه‌تی هه‌رێمی كوردستان له‌سه‌ر چه‌ندان ئاستدا به‌رنامه‌ی ستراتیجی بۆ ڕووبه‌ڕووبوونه‌وه‌ی گه‌نده‌ڵی هه‌بوو و هه‌نگاوی جیددی له‌م پێناوه‌دا ناوه.
ئه‌حمه‌د ئه‌نوه‌ر سه‌رنجی بۆ ئه‌وه ڕاكێشا، كابینه‌ی نۆیه‌م هاوشانی دنیای نوێ بۆ ڕووبه‌ڕووبوونه‌وه‌ی گه‌نده‌ڵی و كه‌مكردنه‌وه‌ی ڕۆتین، هه‌نگاوی گه‌وره‌ی بۆ به‌دجیتاڵكردنی زۆربه‌ی كاره‌كانی حكوومه‌ت له‌ناویشیاندا سیسته‌می بانك و باج و بواره‌كانی دیكه نا.
سه‌رۆكی ده‌سته‌ی ده‌ستپاكیی هه‌رێمی كوردستان هێمای بۆ ئه‌وه كرد، له كابینه‌ی نۆیه‌مدا فۆرمی ده‌ستپاكی به به‌رپرسانی باڵای هه‌رێمی كوردستان درا بۆ ئه‌وه‌ی سه‌روه‌ت و سامانه‌كانیان ئاشكرا بكه‌ن.
ناوبراو باسی له‌وه‌ش كرد، له كابینه‌ی نۆیه‌مدا چاودێریی ناوخۆیی به‌هێز كرا بۆ به‌دواداچوون و چاودێریكردنی داموده‌زگه‌كانی حكوومه‌ت، له هه‌رێمی كوردستان فه‌رمانگه‌ی هه‌ماهه‌نگی و به‌دواداچوون ئه‌و ڕۆڵه‌ی هه‌یه.