کۆمیسیۆنی عێراق ڕاهێنان بە کارمەندانی سەر سندووقەکانی دەنگدان دەکات

کۆمیسیۆنی هەڵبژاردنەکانی عێراق، دەستی بە ڕاهێنانی 41 هەزار کارمەندی سەر سندووقەکانی هەڵبژاردنی پەرلەمانی کوردستان کردووە، کە لە 1431 بنکە بەڕێوە دەچێت.

یەکشەممە، 29-09-2024، د. عیماد جەمیل، سەرۆکی تیمی ڕۆژنامەوانیی کۆمیسیۆنی باڵای سەربەخۆی هەڵبژاردنەکانی عێراق، بە ماڵپەری کوردستان24ـی ڕاگەیاند، دەنگدانی گشتیی پەرلەمانی کوردستان، لە 1266 بنکە و 6318 وێستگە و دەنگدانی تایبەتیش لە 165 بنکە و 749 وێستگە؛ بەڕێوە دەچێت.

سەرۆکی تیمی ڕۆژنامەوانیی کۆمیسیۆنی باڵای سەربەخۆی هەڵبژاردنەکانی عێراق، ڕوونیشی کردەوە، 41 هەزار کەس دەنگدانی گشتی و تایبەتی هەڵبژاردنی پەرلەمانی کوردستان بەڕێوە دەبەن و ماوەی چەند ڕۆژێکە ڕاهێنانیان پێ دەکرێت لەسەر چۆنییەتی سەرپەرشتیی هەڵبژاردنەکە.

ژمارەی بنکە و وێستگەکان لە پارێزگاکانی هەرێمی کوردستان:

دەنگدانی گشتی:

هەولێر: 498 بنکە و 2213 وێستگە

سلێمانی: 477 بنکە و 2373 وێستگە

دهۆک: 264 بنکە و 1596 وێستگە

هەڵەبجە: 27 بنکە و 136 وێستگە

ژمارەی گشتی: 1266 بنکە و 6318 وێستگە

دەنگدانی تایبەت:

هەولێر: 62 بنکە و 306 وێستگە

سلێمانی: 57 بنکە و 276 وێستگە

دهۆک: 33 بنکە و 142 وێستگە

هەڵەبجە: 1 بنکە و 3 وێستگە

بەغدا – ڕەسافە: 1 بنکە و 2 وێستگە

نەینەوا: 4 بنکە و 5 وێستگە

کەرکووک: 1 بنکە و 2 وێستگە

دیالە: 1 بنکە و 1 وێستگە

ئەنبار: 1 بنکە و 1 وێستگە

بەغدا – کەرخ: 2 بنکە و هەشت وێستگە

واست: 1 بنکە و 1 وێستگە

سەڵاحەددین: 1 بنکە و 2 وێستگە

ژمارەی گشتی: 165 بنکە و 749 وێستگە

د. عیماد جەمیل باسی لەوەش کرد، 48 کاتژمێر پێش دەنگدانی تایبەت واتا 16-10-2024، ئامێر و کەلوپەلەکانی تایبەت بە دەنگدان بۆ ئەو قوتابخانانەی هەرێمی کوردستان دەگوازرێنەوە کە کراونەتە بنکەکانی دەنگدان و تێست دەکرێن.

بە بڕیاری کۆمیسیۆنی باڵای سەربەخۆی هەڵبژاردنەکانی عێراق، لە بەیانیی چوارشەممەوە، 25-09-2024، بانگەشەی هەڵبژاردنی خولی شەشەمی پەرلەمانی کوردستان دەستی پێ کردووە و تاوەکوو 15-10-2024 بەردەوام دەبێت.

کۆمیسیۆن دەستەیەکی تایبەتی بۆ چاودێریی بانگەشەی لایەن و کاندیدە سەربەخۆوەکان بۆ هەڵبژاردنی پەرلەمانی کوردستان پێک هێناوە و ئاماژەی بەوە کردووە، ئەو لایەنانەی سەرپێچی ڕێنماییەکانیان دەکەن، بە چەندین شێوازی جیاواز سزا دەدرێن تا دەگاتە دوورخستنەوەی یەکجارەکی لە پرۆسەی هەڵبژاردن.

دەنگدانی گشتیی خولی شەشەمی پەرلەمانی کوردستان ڕۆژی 20-10-2024 و دەنگدانی تایبەتی پێشمەرگە و هێزە ئەمنییەکانی دیکەش؛ ڕۆژی 18-10-2024 بەڕێوە دەچێت. 136 لیست و 1,191 کاندیدی لایەنەکان و سەربەخۆ و کۆتاکان ڕکابەریى بۆ بەدەستهێنانى 100 کورسیی پەرلەمان دەکەن.

دابەشکاریی ژمارەی کورسییە گشتییەکانی پەرلەمانی کوردستان بەسەر پارێزگاکاندا:

1.  هەولێر: 32 کورسی

2.  سلێمانی: 36 کورسی

3.  دهۆک: 24 کورسی

4.  هەڵەبجە: سێ کورسی

(کۆی گشتی: 95 کورسی)

دابەشکاریی ژمارەی کورسیی کۆتای پەرلەمانی کوردستان بەسەر پارێزگاکاندا:

1.  هەولێر: دوو کورسی

2.  سلێمانی: دوو کورسی

3.  دهۆک: یەک کورسی

4.  هەڵەبجە: سفر کورسی

(کۆی گشتی: 5 کورسی)