لاهور شێخ جەنگی بۆ کوڕەکانی مام جەلال: ناتوانن تا سەر لەسەر مێژوو و ناوی باوکتان بژین
لاهور شێخ جەنگی، لە ساڵیادی کۆچی دوایی مام جەلال ڕایگەیاند "کوڕەکانی مام جەلال ناتوانن تا سەر لەسەر مێژوو و ناوی ئەو بژین".
پێنجشەممە، 03-10-2024، لاهور شێخ جەنگی، سەرۆکی هاوپەیمانیی بەرەی گەل، لە ساڵیادی کۆچی دوایی مام جەلال، سەرۆککۆماری پێشووتری عێراق و سكرتێری پێشووی گشتیی یەكێتیی نیشتمایی كوردستان؛ پەیامێکی بڵاو کردەوە.
لاهور شێخ جەنگی لە پەیامەکەیدا باسی لە پێگە و ڕۆڵی مام جەلال لە مێژووی سیاسیی کوردیدا کردووە و پێی وایە بە "زیندوو و گەش دەمێننەوە". جەختیشی لەوە کردووەتەوە، کوڕەکانی مام جەلال " ناتوانن تا سەر لەسەر مێژوو و ناوی ئەو بژین و کاری لار و ناجۆر بکەن".
مام جەلال، ڕۆژی 17-12-2012 کە ئەوکات سەرۆک کۆماری عێراق بوو؛ بەهۆی تێكچوونی باری تەندروستییەوە لە بەغداوە ڕەوانەی ئەڵمانیا كرا و ڕۆژی 3-10-2017 بەهۆی نەخۆشییەکەیەوە كۆچی دوایی كرد.
بە گوتەی لاهور شێخ جەنگی "خەڵک دوێنێی جەنابی مام جەلال بە هەموو باشی و خراپییەکانەوە دەبینێت و ئێستای ئەوانیش (کوڕەکانی مام جەلال) دەبینێ کە خۆیان و کردەوەکانیان بەناوی ئەوەوە هەڵواسیوە!".
وەفای لاهور شێخ جەنگی بۆ مام جەلال، وەکوو ئەوەی خۆی باسی کردووە "تەنها ڕەهەندی سیاسیی نییە؛ بەڵکوو ڕەهەندی کۆمەڵایەتی و مرۆڤایەتیی زۆر قووڵی هەیە. بۆیە هەتا مابم، هەوڵ دەدەم خاڵە گەش و جوانەکانی ژیانی سیاسی و کۆمەڵایەتیی ئەو گەش ڕابگرم".