به‌ وێنه‌.. خۆپیشاندانه‌كه‌ی ئه‌مڕۆی پێشمه‌رگه‌ له‌ دژی "سووكایه‌تییه‌كانی په‌رله‌مانتاره‌كه‌ی گۆڕان"

K24 - هه‌ولێر:

هه‌زاران پێشمه‌رگه‌ دژی لێدوانی ئه‌ندام په‌رله‌مانێكی بزوتنه‌وه‌ی گۆڕان گردبوونه‌وه‌ و كه‌مپه‌ینێكیان راگه‌یاندووه‌ و  داوا ده‌كه‌ن له‌ رووی یاسایی لێپێچینه‌وه‌ له‌ دژی ئه‌و ئه‌ندام په‌رله‌مانه‌ بكرێت پاش ئه‌وه‌ی سوكایه‌تی به‌  خانه‌واده‌ی پێشمه‌رگه‌ و پێشمه‌رگه‌ شه‌هیده‌كان كردبوو .

له‌و گردبوونه‌وه‌ و كه‌مپه‌ینه‌ی هێزه‌كانی پێشمه‌رگه‌دا(مه‌نسوور بارزانی) فه‌رمانده‌ی له‌شكری تایبه‌تی یه‌ك و گوڵان و (ره‌وان ئیدریس بارزانی) فه‌رمانده‌ی هێزی تایبه‌تی 1 و ژماره‌یه‌كی زۆری فه‌رمانده‌ سه‌ربازییه‌كانی پێشمه‌رگه‌ و پێشمه‌رگه‌كان به‌شدارن و سه‌ره‌تا به‌ سروودی ئه‌ی ره‌قیب كه‌مپه‌ین و گردبوونه‌وه‌كه‌ ده‌ستیپێكرد.

گردبوونه‌وه‌ی ئه‌و هه‌زاران پێشمه‌رگه‌یه‌ له‌ به‌رده‌م داواكاریی گشتییه‌ له‌ شاری هه‌ولێری پایته‌خت و له‌ گوتاری كه‌مپه‌ینه‌كه‌دا راگه‌یێنرا كه‌ ئه‌وان به‌و سوكایه‌تییه‌ی ئه‌ندام په‌رله‌مانه‌كه‌ی گوڕان هێنده‌ نیگه‌ران بوون زیاتر له‌و گولانه‌ی كه‌ هاوسه‌نگه‌ره‌كانی شه‌هید كردوون ئازاریداوون و برینداری كردوون.

هه‌ر بۆیه‌ داوایان ده‌كرد كه‌ یاسا به‌ رۆڵی خۆی هه‌ستێت و لێپێچینه‌وه‌ له‌و ئه‌ندام په‌رله‌مانه‌ و ئه‌و كه‌سانه‌ی دیكه‌ش بكات كه‌ سوكایه‌تییان به‌ پێشمه‌رگه‌ و كه‌سوكاری پێشمه‌رگه‌ شه‌هیده‌كان كردووه‌.