ئەمریكا لە پشتیوانی كردنی پێشمەرگە بەردەوام دەبێت

بارزانی و مەكگۆرك شەڕی مووسڵ و قۆناغی دوای داعش تاوتوێ دەكەن

K24 - ھەولێر

مەسعوود بارزانی سەرۆكی ھەرێمی كوردستان پێشوازی لە برێت مەكگورگ نوێنەری تایبەتی سەرۆكی ئەمەریكا لە هاوپەیمانێتیی دژی داعش كرد و لە دیدارێكدا شەڕی مووسڵ و قۆناغی دوای داعشیان لە عێراق تاوتوێ كرد، لەو دیدارەدا مەكگورگ جەختیكردەوە، ئەمریكا بەردەوام دەبێت لە پشتیوانی و راهێنانی سوپای ئەمەریكا بۆ هێزەكانی پێشمەرگە.

بەگوێرەی ماڵپەڕی فەرمی سەرۆكایەتی ھەرێمی كوردستان، ئەمڕۆ لە سەلاحەدین مەسعود بارزانی سەرۆكی هەرێمی كوردستان پێشوازی لە برێت مەكگورگ نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی دژی داعش و شاندێكی یاوەری كرد كە پێكهاتبوو لە دۆگلاس سڵیمان باڵیۆزی ئەمەریكا لە عێراق و كین گرووس كونسوڵی ئەمەریكا لە هەولێر و ژمارەیەك ڕاوێژكاری باڵیۆزخانەی ئەمەریكا لە بەغدا.

لە دیدارەكەدا بارودۆخی مەیدانیی بەرەكانی ڕووبەڕووبوونەوەی تیرۆریستان لە شاری موسڵ خرایە بەر باس و بیروڕایش لەبارەی تەحەدیاتی قۆناغی دوای داعش ئاڵوگۆڕ كرا. هەروەها نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی دژی داعش وێڕای ئاماژەدان بە بایەخی هەرێمی كوردستان بۆ وڵاتەكەی جەختی لە بەردەوامیی پشتیوانی و ڕاهێنانی سوپای ئەمەریكا بۆ هێزەكانی پێشمەرگە كردەوە.

هەر لەم دیدارەدا ڕۆشنایی خرایە سەر پەیوەندییەكانی نێوان هەرێم و بەغدا و ئایندە و پڕۆسەی سیاسیی عێراق.

لە بەشێكی دیكەی ئەو كۆبوونەوەیە بارودۆخی سیاسی و ئەمنیی سووریا و هەنگاو و پلانەكانی تێكشكاندنی داعش لە سووریا تاوتوێ كرا.