ئاوارە عەرەبەکان متمانەیان بە بەڵێنی لیستە عەرەبییەکان نییە
"بەڵنێك بە خەڵك نادەین كە نەتوانین جێبەجێی بكەین"
K24 - سلێمانی
به‌شێك له ئاوارە عه‌ره‌بەکانی نیشته‌جێی سلێمانی ده‌ڵێن، ته‌نیا 30% متمانه‌یان به به‌ڵێنی لیسته عه‌ره‌بییه‌كان هه‌یه، كاندیدێكی كوردی لیسته عه‌ره‌بییه‌كانیش له سلێمانی رایدەگەیەنێت، به‌ڵێنێك ناده‌ن كه دڵنیا نه‌بن له‌وه‌ی ناتوانن پابه‌ندی بن.
محه‌مه‌د فازڵ، خوێندكاری ماستەرە و لە ئەنبارەوە هاتووەتە سلێمانی سەرقاڵی خوێندنە، ده‌رباره‌ی هەڵبژاردنی خولی داھاتووی پەرلەمانی عێراق، بە كوردستان24 گوت: "پێشتر كاندید و لیستە عەرەبیەكانمان تاقیكردووەتەوەو تەنیا لە 30% بەڵێنەكانیان بەجێهێناوه. بە بڕوای من گرنگ نییە كاندید لە كام تایفە و نەتەوەیەكە، گرنگ ئەوەیە توانای ئیدارەدانی ئەم نیشتمانەی ھەبێت، دەنگ بەو لیست و كاندیدە دەدەم كە پێم گونجاوە".
جیاواز له هه‌ڵبژاردنه‌كانی رابردووی ئه‌نجوومه‌نی نوێنه‌رانی عێراق، ئه‌مجاره چەند لیستێكی عەرەبی له نێویاندا هاوپەیمانێتی ئەلنەسر به سه‌رۆكایه‌تی حەیدەر عەبادی، لە هه‌رێم كاندیدیان هەیە.
ژیان ره‌شید، كاندیدی لیستی هاوپەیمانی ئەلنەسر لە سلێمانی دەڵێت: "ئێمە بەڵنێك بە خەڵك نادەین كە نەتوانین جێبەجێی بكەین، ھیواخوازین لە داھاتوودا ئێمە بتوانین كاربكەین و كێشەكانی كوردستان بگەیەنینە بەغدا و ھاوكاری خەڵك بكەین".
پرسی بەڵێنی كاندیدو لیسته‌كان له هه‌ڵبژاردنه‌كان له‌لایه‌ك و بێ متمانەیی دەنگدەران له‌لاكه‌ی دیكە، بوونه‌ته هۆكاری ئه‌وه‌ی ئه‌نجامی هه‌ڵبژاردنی ئه‌مجاره چاوەڕوان نەكراوبێت، جیا له‌وه‌ی تا ئێستا زیاتر لە 150 هەزار كارتی دەنگدان لە پارێزگای سلێمانی لە لایەن دەنگدەرانەوە وەرنەگیراوەتەوە.
ھ.م
