تەقینەوەیەك لە خانەقین ژن و پیاوێكی كوشت

K24 - گەرمیان

ھەرێم جاف، پەیامنێری كوردستان24 لە گەرمیان رایگەیاند: "لەئەنجامی تەقینەوەی بۆمبێكی چێندراو لە گوندی مەردانی سەر بە خانەقین ژن و پیاوێك كە ھاوژینی یەكتربوون گیانیان لەدەستدا و سێ منداڵیشیان بریندارن یەكێك لە بریندارەكان باری تەندورستی ناجێگیرە".

سەرچاوەیەکی ئاسایشی خانەقین كە نەیویست ناوی بنووسرێت، بە كوردستان24 راگەیاند: "ئەندامانی ئەو خێزانەی کە بوونەتە قوربانی ویستویانە بچنەوە گوندەکەیان، چونکە خانووی نوێیان دروستکردووە، لەوکاتەدا بۆمبێكی چێندراویان پێدا تەقیوەتەوە و بووەتە ھۆی گیان لەدەستدانی ژن و پیاوەکە و برینداربوونی منداڵەكانیان".

ئەمە لەكاتێكدایە لە 7 رۆژی رابردوودا ئەمە پێنجەمین بۆمبە لە سنووری خانەقین دەتەقێتەوە، دانیشتووانی ناوچەكەش ھۆکاری زۆر بوونی تەقینەوەکان و دروستبوونی بۆشایی ئەمنی بۆئەوە دەگەڕێنەوە كە دوای 16 ئۆکتۆبەری ساڵی رابردوو ھێزی پێشمەرگە لەناوچەكە نەماوە و حەشدی شەعبی و سوپای عێراق ناتوانن ئەمنییەتی ناوچەكە بپارێزن.

ھ.م