په‌یامێك له‌ سه‌رۆك بارزانی-یه‌وه‌ بۆ رای گشتی

K24 - هه‌ولێر:

سه‌رۆك مه‌سعود بارزانی، له‌ په‌یامێكدا، له‌ باره‌ی كاندیدانی پۆستی سه‌رۆككۆماری عێراقی فیدرال، رایده‌گه‌یه‌نێت، پۆستی سەرۆككۆمار پەیوەستە بە  ئیستحقاقاتی سیاسی بۆ گەلی كوردستان، نەك شەخس و لایەنێك.

سه‌رۆك بارزانی له‌ په‌یامه‌كه‌یدا روونیشی ده‌كاته‌وه‌، به‌باشیان زانیوه‌، لایەنە كوردستانییەكان لەسەر یەك كاندید رێككەوتبان و ده‌ڵێت: "به‌ڵام برادەرانی یەكێتیی نیشتیمانی تاكلایەنە كاندیدی خۆیان دیاریكرد و دواتر لایەنە كوردستانییەكانی تر و پارتی دیموكراتی كوردستانیش كاندیدی خۆیان بۆ ئەو پۆستە دیاریكرد".

وه‌ك له‌ ناوه‌ڕۆكه‌ی په‌یامه‌كه‌ی سه‌رۆك بارزانی-دا هاتووه‌: "پێمان باشە دیاریكردنی بەڕێزێك بۆ سەرۆكایەتیی كۆماری عێراق بۆ ڕای فڕاكسیۆنە كوردستانییەكان لە بەغدا بگەڕێتەوە. هەر بەڕێزێك دەنگی زۆرینەی نوێنەرانی لایەنە كوردستانییەكانی بەدەستهێنا وەك كاندیدی كوردستان بۆ سەرۆكایەتیی كۆمار دیاری بكرێت و داوا دەكەم هەموو لایەك ڕێز لە ڕای زۆرینەی فراكسیۆنە كوردستانییەكان لە بەغدا بگرن."

ده‌قی په‌یامه‌كه‌ی سه‌رۆك بارزانی:

"پەیامێك لە سەرۆك بارزانی بۆ ڕای گشتی

بەناوی خودای بەخشندە و میهرەبان

ئەمڕۆ هەینی 28ـی 9ـی 2018 لەسەر داوای خۆی و بۆ پرس و ڕا لەسەر پۆستی سەرۆككۆمار، بەڕێز د. بەرهەم ساڵح سەردانی كردین.

لەگەڵ ڕێز بۆ كاك د. بەرهەم بەڵام پۆستی سەرۆككۆماری پەیوەستە بە  ئیستحقاقاتی سیاسی بۆ گەلی كوردستان، نەك شەخس و لایەنێك و ئەم پۆستە پەیوەندی بە هەموو  پێكهاتەكانی عێراقەوە هەیە بە گەلی كوردستانیشەوە. پێمان باش بوو كە هەموو لایەنە كوردستانییەكان لەسەر یەك كاندید ڕێك كەوتبان، بەڵام برادەرانی یەكێتیی نیشتیمانی تاكلایەنە كاندیدی خۆیان دیاری كرد و دواتر لایەنە كوردستانییەكانی تر و پارتی دیموكراتی كوردستانیش كاندیدی خۆیان بۆ ئەو پۆستە دیاری كرد.

ئێستایش بۆ یەكلاییكردنەوەی ئەم پرسە پێویستە میكانیزمی دیاریكردنی كاندید بۆ سەرۆككۆمار هەر لای لایەنە كوردستانییەكان بمێنێتەوە و، ڕێز بگیرێت لە ڕای زۆرینەی خەڵكی كوردستان. هەروەها پێمان باشە دیاریكردنی بەڕێزێك بۆ سەرۆكایەتیی كۆماری عێراق بۆ ڕای فڕاكسیۆنە كوردستانییەكان لە بەغدا بگەڕێتەوە. هەر بەڕێزێك دەنگی زۆرینەی نوێنەرانی لایەنە كوردستانییەكانی بەدەستهێنا وەك كاندیدی كوردستان بۆ سەرۆكایەتیی كۆمار دیاری بكرێت و داوا دەكەم هەموو لایەك ڕێز لە ڕای زۆرینەی فراكسیۆنە كوردستانییەكان لە بەغدا بگرن.

مسعود بارزانی

28ـی 9ـی 2018"