لە گەرمیان دوو تەرم دۆزرانەوە
بۆ لێكۆڵینەوە براونەتە پزیشكی دادی
K24 - گەرمیان
لە قەزای كەلاری دەڤەری گەرمیان تەرمی دوو كەس لەناو پڕۆژەیەكی نیشتەجێبوون دۆزرایەوە.
رائیدی مافپەروەر عەلی جەمال قدووری لە راگەیاندنی پۆلیسی گەرمیان لە راگەیەندراوێكدا ئاشكرای كرد: "ئەمڕۆ دووشەممە ئاگادارکراینەوە لە حاڵەتی مردنی دوو کرێکار لە گوندی لانستی کە پڕۆژەیەکی نوێیە لە قەزای کەلار، دوای گەشتنی مەفرەزەکانی 104ی کەلار و پۆلیسی نەهێشتنی تاوان بەپێی لێکۆڵینەوە سەرەتاییەکان گومان دەکرێت موەلیدە لەژوورەکەیان کاری کردبێت و بەهۆی غازی موەلیدەوە گیانیان لەدەست دابێت".
راشیگەیاند: "ئەو دوو کرێکارەی گیانیان لەدەستداوە خەڵكی سوریان و ئاوارەن بە مەبەستی کارکردن روویان لە سنووری گەرمیان کردووە لەئێستادا بە مەبەستی پشکنین تەرمەکانیان رەوانەی پزیشکی دادوەری سلێمانی کراوەو پۆلیس دەستی بە لێکۆڵینەوە کردووە لەسەرهۆکاری گیان لەدەستدانیان".
