بومەلەرزە چەند پارێزگایەكی رۆژھەڵاتی كوردستانی ھەژاند
گوڕی بومەلەرزەكە 5.2 پێوەری رێختەر بوو
K24 - ھەولێر
بومەلەرزەیەك بە گوڕی 5.2 پلەی پێوەری رێختەر ئیلام و كرماشانی ھەژاند و بەھۆی لافاو باری نائاسایی لە لوڕستان راگەیەندرا.
ئاژانسی ھەواڵی ئیرنا رایگەیاند، كاتژمێر 14:37 دەقە بە كاتی ئێران، بوومەلەرزەیەك بە گوڕی 5.2 پلەی پێوەری رێختەر ئیلام و كرماشانی ھەژاندوەو پەیوەندی تەلەفۆنی و ئینتەرنێت لە ئیلام پچڕاوە.
ھەروەھا بەھۆی باران بارین و لافاو فڕۆكەخانەكانی ئیلام و لوڕستان داخران و بەھۆی لافاو باری نائاسایی لە لوڕستان راگەیاندرا، لە پارێزگای سنەش رێگەی 150 گوند بەھۆی بەفربارین داخرا.
بە گوێرەی راگەیەندراوی بەڕێوەبەرایەتی كەشناسی و بومەلەرزەزانی ھەرێمی كوردستان، بومەلەرزەی كرماشان لە قوڵایی 10 كیلۆمەتر روویداوە و لە ناوچەكانی مەندەلی و ناوەڕاست و خوارووی عێراق ھەستی پێكراوە.
