سیاسی

وڵاتانی كه‌نداو چاوه‌ڕێی گه‌رده‌لوولێكی خوله‌گه‌یین‌

كه‌شناسی هۆشداری ده‌دات

ڕۆژهەڵاتی ناوەڕاست

K24- هه‌ولێر:

روانگه‌كانی كه‌شناسی له‌ سعوودیه‌، ئیمارات و سه‌ڵته‌نه‌ی عومان پێشبینی ده‌كه‌ن، گه‌رده‌لوولی خولگه‌یی "مه‌ها" كه‌ ئێستا له‌ رۆژهه‌ڵاتی ده‌ریای عه‌ره‌ب چه‌قی گرتووه‌، بۆ گه‌رده‌لوول و بۆرانێكی به‌هێزی خولگه‌یی پله‌ یه‌ك بگۆڕێت و هۆشداریش ده‌ده‌نه‌ وڵاتانی ناوچه‌كه‌.

روانگه‌ی كه‌شناسی عومان دووپاتیكرده‌وه‌، خێرایی با له‌ چه‌قی گه‌رده‌لووله‌كه‌ ده‌گاته‌ 65 گرێ و ئێستا له‌ نزیكترین خاڵی وڵاته‌كه‌یان "ره‌ئس ئه‌لمه‌دره‌كه‌" ده‌كه‌وێته‌ دووری 850 كیلۆمه‌تر و به‌ ئاراسته‌ی باكوور و باكووری رۆژئاوا به‌ره‌و ناوه‌ڕاستی ده‌ریای عه‌ره‌ب به‌ڕێوه‌یه‌.

‌روانگه‌ی ناوبراو ئاماژه‌ی به‌وه‌شداوه‌، پێشبینی ده‌كرێت گه‌رده‌لووله‌كه‌ رێڕه‌وه‌كه‌ی به‌ره‌و كه‌ناره‌كانی هیندستان بگۆڕێت.

لای خۆشیه‌وه‌ ده‌سته‌ی گشتیی روانگه‌ و پاراستنی ژینگه‌ له‌ سعوودیه‌ ئاشكرایكرد، دوایین پێشبینییه‌كان ئاماژه‌ به‌وه‌ ده‌كه‌ن، "گه‌رده‌لوولی مه‌ها بۆ گه‌رده‌لوول و بۆرانێكی به‌هێزی خولگه‌یی له‌ پله‌ی یه‌ك ده‌گۆڕێت" و ده‌كه‌وێته‌ نێوان هێڵی درێژی 66.2 پله‌ له‌ رۆژهه‌ڵات و بازنه‌ی پانی 17.6 پله‌ له‌ باكوور.

ئاماژه‌ی به‌وه‌شدا، خێرایی با له‌ سه‌نته‌ری گه‌رده‌لووله‌كه‌ ده‌گاته‌ 60 بۆ 65 گرێ "110 تا 120كم له‌ كاتژمێرێكدا" و به‌ ئاراسته‌ی باكوور و باكووری رۆژئاوای له‌ ناوه‌ڕاستی ده‌ریای عه‌ره‌ب به‌ خێرایی 6 گرێ به‌ڕێوه‌یه‌.

پێشبینیشی كرد، له‌ ماوه‌ی 24 كاتژمێری داهاتوودا گه‌رده‌لووله‌كه‌ به‌هێزتر ببێت و بگاته‌ پله‌ 2.

هه‌روه‌ك روانگه‌كان ئاماژه‌یان به‌وه‌شداوه‌، حاڵه‌تی خولگه‌یی "كیار" له‌ ده‌ریای عه‌ره‌ب خه‌ریكه‌ چالاك ده‌بێت و كاریگه‌ری له‌سه‌ر به‌شێك له‌ كه‌نداوی عه‌ده‌ن و سۆماڵ درووستكردووه‌ و پێشبینی ده‌كرێت بار و بۆرانیكی به‌هێزی هه‌ڵگرتبێت و له‌ 24 كاتژمێری داهاتووشدا شه‌پۆله‌كانی ده‌ریا به‌رزبوونه‌وه‌یه‌كی به‌رچاو به‌خۆیانه‌وه‌ ببینن.

روانگه‌كه‌ دووپاتیشیكرده‌وه‌، تا ئێستا پێشبینییه‌كان ئاماژه‌ به‌وه‌ ده‌كه‌ن، كه‌ ئه‌و گه‌رده‌لووله‌ كاریگه‌ری ئه‌وتۆی له‌سه‌ر كه‌ش و هه‌وای سعوودییه‌ نابێت.

له‌ لایه‌كی دیكه‌وه‌ ناوه‌ندی نیشتیمانی بۆ چاودێری كه‌ش و هه‌وا له‌ ئیمارات رایگه‌یاند، گه‌رده‌لوولی خولگه‌یی مه‌ها له‌ رۆژهه‌ڵاتی ده‌ریای عه‌ره‌ب بۆ باهۆزێكی خولگه‌یی به‌هێز له‌ پله‌ یه‌ك گۆڕاوه‌ و ده‌كه‌وێته‌ نێوان بازنه‌ی پانی 17.6 باكوور و هێڵی درێژی 65.9 رۆژهه‌ڵات و خێرایی با له‌ چه‌قی گه‌رده‌لووله‌كه‌ ده‌گاته‌ 120 بۆ 130 كیلۆمه‌تر له‌ كاتژمێرێكدا.

پێشبینیش ده‌كات، له‌ 24 كاتژمێری داهاتوودا خێرایی با له‌ ده‌وری چه‌قه‌كه‌ی بگاته‌ 160 بۆ 170 كیلۆمه‌تر له‌ كاتژمێرێكدا و دواتر بۆ رۆژی سێشه‌ممه‌ ئاراسته‌كه‌ی به‌ره‌و باكووری رۆژهه‌ڵات بگۆڕێت.

سه‌باره‌ت به‌ كاریگه‌ری ئه‌و گه‌رده‌لووله‌ له‌سه‌ر ئیمارات، روانگه‌كه‌ گوتی: ئه‌مشه‌و كاریگه‌رییه‌كه‌ی له‌ ده‌ریای عومان ده‌رده‌كه‌وێت و پێشبینی ده‌كرێت له‌ رۆژی دووشه‌ممه‌وه‌ تا چوارشه‌ممه‌ ناوچه‌ كه‌ناراوه‌كانی رۆژهه‌ڵات بكه‌ونه‌ به‌ر كاریگه‌ری شه‌پۆله‌كان.

فه‌رمانگه‌ی فریاگوزاری و قه‌یرانه‌كانی ئیماراتیش هۆشداری دا، كه‌ پێشبینی ده‌كرێت له‌ سبه‌ی دووشه‌ممه‌وه‌ به‌هۆی ئه‌و گه‌رده‌لووله‌ و به‌رزبوونه‌وه‌ی شه‌پۆله‌كانی ده‌ریا، به‌شێك له‌ ناوچه‌ نزمه‌ كه‌ناراوییه‌كانی رۆژهه‌ڵاتی ئه‌و وڵاته‌ ژێرئاو بكه‌ون.

داواشی له‌ هاووڵاتیان كرد، زۆر به‌ وریاییه‌وه‌ ره‌فتار له‌گه‌ڵ گۆڕانكارییه‌كانی كه‌ش و هه‌وا بكه‌ن و خۆیان له‌ ناوچه‌ كه‌ناراوییه‌كانی رۆژهه‌ڵات به‌ دوور بگرن.‌

H.B

کوردستان24 دیجیتاڵ میدیا ,