خۆپیشاندان له ئێران به‌رده‌وامه و حكوومه‌ت هه‌ڕه‌شه‌ی به‌كارهێنانی هێزی زیاتر ده‌كات
له تاران و ئه‌سفه‌هان شه‌وانه خۆپیشاندانه
K24 - هه‌ولێر:
به‌گوێره‌ی ئامارێكی ئاژانسی هه‌واڵی میهری ئێرانی، ژماره‌ی ئه‌و كه‌سانه‌ی له سێ رۆژی رابردوودا له شاره‌كانی ئێران دژی گرانكردنی نرخی به‌نزین خۆپیشاندانیان ئه‌نجامداوه، گه‌یشتووه‌ته 87400 كه‌س و خۆپیشاندانه‌كانی ئه‌مجاره‌شی به توندتر له خۆپیشاندانه‌كانی ساڵی 2017 ناوبردووه.
ئاژانسه ئێرانییه‌كه ئاماژه‌ی به‌وه‌شكردووه، نزیكه‌ی 1000 كه‌س به‌هۆی خۆپیشاندانه‌كانه‌وه تا ئێستا ده‌ستگیركراون.
هه‌روه‌ها رایگه‌یاندووه، كه‌سانێك له ناو خۆپیشانده‌ران هه‌وڵی "ئاژاوه و دزی"ـیان داوه و هێرشیان كردووه‌ته سه‌ر زیاتر له 100 بانك.
ئێستا شه‌وانه له تاران خۆپیشاندان به‌ڕێوه‌ده‌چێت و خۆپیشانده‌ران و هێزه ئه‌منییه‌كان رووبه‌ڕووی یه‌كتری ده‌بنه‌وه. خۆپیشانده‌رانی ئێرانی درووشمی "مه‌رگ بۆ دیكتاتۆر"ـیان به‌رزكردووه‌ته‌وه و له زۆر ناوچه‌ی وڵاته‌كه به‌تایبه‌تی رۆژهه‌ڵاتی كوردستان هێزه ئه‌منییه‌كان ته‌قه‌یان له خۆپیشانده‌ران كردووه و ژماره‌یه‌ك خۆپیشانده‌ریان كوشتووه و بریندار كردووه.
چالاكانی تۆڕه كۆمه‌ڵایه‌تییه‌كان تۆماری ڤیدیۆیی بڵاوده‌كه‌نه‌وه و ئاماژه‌یان به‌وه‌شكردووه له شاری ئه‌سفه‌هانیش شه‌وان خۆپیشاندان ده‌كرێت و هێزه ئه‌منییه‌كان ته‌قه‌یان لێده‌كه‌ن بۆ ئه‌وه‌ی بڵاوه‌ی لێبكه‌ن. له شاری شیرازیش هێزه ئه‌منییه‌كان ته‌قه‌یان له خۆپیشانده‌ران كردووه.
هاوكات عه‌لی ره‌زا ره‌حمانی فه‌زڵی، وه‌زیری ناوخۆی ئێران، هه‌ڕه‌شه‌ی له خۆپیشانده‌ران كردووه، كه بۆ گێڕانه‌وه‌ی ئارامی هێزه ئه‌منییه‌كان دژی خۆپیشانده‌ران ده‌جوڵێنێ، ئه‌گه‌ر كارێك بكه‌ن ببێته هۆی شێواندن و تێكدانی ئاسایشی هاووڵاتیان" وه‌ك وه‌زیری ناوخۆ گوتوویه‌تی، تا ئێستا دانیان به‌خۆیاندا گرتووه به‌رامبه‌ر خۆپیشانده‌ران.
له هه‌مان كاتدا وه‌زاره‌تی ئیتڵاعاتی ئێران هه‌ڕه‌شه‌ی له خۆپیشانده‌ران كردووه، هه‌ر "پێشێلكارییه‌كی یاسایی" بكه‌ن، به‌هێز به‌ره‌نگاریان ببنه‌وه و پارێزگاری له ئاسایشی نه‌ته‌وه‌یی بكه‌ن.
له‌یلایه‌كی دیكه‌وه برایان هوك، نێرده‌ی تایبه‌تی ئه‌مه‌ریكا بۆ كاروباری ئێران، گوتوویه‌تی: "گه‌لانی ئێران له رژێمه‌كه‌یان وه‌ڕس بوون، ناڕه‌زایه‌تی خه‌ڵك دژی گرانبوونی به‌نزین، نوێترین نموونه و هه‌ستكردنی خه‌ڵكه به سته‌می رژێمی ئێران".
