كیم جۆنگ ئون بۆ ساڵی نوێ مژده‌ی چه‌كێكی نوێی ستراتیژیی پێیه
سه‌رۆكی كۆریای باكوور: هه‌ندێك داواكاریی ئه‌مه‌ریكا له داواكاریی مافیاكان ده‌چێت
K24 - هه‌ولێر:
ئه‌مڕۆ چوارشه‌ممه 1/1/2020 ئاژانسی هه‌واڵی ناوه‌ندیی كۆریای باكوور رایگه‌یاند: "كیم جۆنگ ئون، سه‌رۆكی كۆریای باكوور به‌ڵێنی به‌رده‌وامیدان به ئاماده‌سازییه‌كانی به‌رپه‌رچدانه‌وه‌ی ئه‌تۆمی ده‌دات و له ئایینده‌یه‌كی نزیكدا چه‌كێكی ستراتیژیی نوێش ئاشكرا ده‌كات".
به‌گوێره‌ی زانیارییه‌كانی ئاژانسه فه‌رمییه‌كه‌ی كۆریای باكوور، كیم جۆنگ ئون گوتوویه‌تی: "به‌رنامه‌ی ئه‌تۆمی كۆریای باكوور به‌نده به هه‌ڵوێستی ئه‌مه‌ریكاوه ، چونكه واشنتن هه‌ندێك داواكاریی هه‌یه له داواكاریی و كرده‌وه‌ی مافیاكان ده‌چێت، به‌ڵام هێشتا ده‌رگا به كراوه‌یی ده‌هێڵینه‌وه بۆ گفتوگۆكردن".
لێدوانه‌كانی سه‌رۆكی كۆریای به‌بۆنه‌ی كۆتاییهاتنی ئه‌و ماوه‌یه بوو كه تا كۆتایی ساڵی 2019 ده‌رفه‌تی به ئه‌مه‌ریكا دابوو بۆ ئه‌وه‌ی دانووستانه‌كان ده‌ستپێبكه‌نه‌وه.
