بەرگری شارستانیی غەززە: ئیسرائیل لە مزگەوتێکدا 21 کەسی کوشت
بەرگری شارستانیی غەززە کوژرانی 21 کەسی لە هێرشێکی ئاسمانی فڕۆکە جەنگییەکانی ئیسرائیلی لە مزگەوتێکی دێربەلەح لە ناوەڕاستی کەرتی غەززە ڕاگەیاند و سوپای ئیسرائیلیش دەڵێ "کوژراوەکان چەکدارانی حەماس بوون".
مەحموود بەسل گوتەبێژی بەرگری شارستانیی غەززە بە فرانس پرێسی ڕاگەیاندووە، بەرە بەیانی ئەمڕۆ یەکشەممە، فڕۆکە جەنگییەکانی ئیسرائیل لە دێر بەلەح لە ناوەڕاستی کەرتی غەززە، مزگەوتێکیان بۆمباران کردووە کە خەڵکی ئاوارەی تێدابووە و بەهۆیەوە 21 کەس کوژران.
لەلایەن خۆیەوە سوپای ئیسرائیل ڕایگەیاندووە، لە هێرشەکەدا ژمارەیەک چەکداری حەماسیان کوشتووە، نەک خەڵکی مەدەنی.
سوپای ئیسرائیل لە ڕاگەیەندراوێکدا بڵاویکردووەتەوە، دوای گەیشتنی زانیاری هەواڵگری لەلایەن سەرچاوەکانی سوپا و شاباک، لە هێرشێکی ورد چەکدارانی حەماسیان لە نێو باڵەخانەیەکدا لە ناوچەی دێربەلەح بۆمباران کردووە، کە پێشتر شوێنەکە مزگەوت بووە.
لەلایەکی دیکەوە ناوەندی فریاگوزاری تەندروستی فەڵەستین ڕاگەیاندووە، بەهۆی هێرشێکی فڕۆکە جەنگییەکانی ئیسرائیل بۆ سەر خانووێک لە کەمپی جەبالیا 10 کەس کوژراون و ژمارەیەکیش بریندار گەیەندراونەتە نەخۆشخانەکان.
نزیکەی ساڵێک بەسەر هێرشەکانی چەکدارانی حەماس بۆ سەر ئیسرائیل تێدەپەڕێت، کە کاردانەوەکەی بووە هێرشی فراوانی سوپای ئیسرائیل بۆ سەر کەرتی غەززە و تاوەکوو ئیستاش 41 هەزار و 825 فەڵەستینی کوژراون و 96 هەزار و 910 کەسی دیکەش برینداربوون.