ئێران: : ئێمە خوازیاری جەنگ نین، دەبێ ڕێگەی دیپلۆماسی کارا بکرێ
وەزیری دەرەوەی ئێران لە سەردانەکەی بۆ عومان و پاش کۆبوونەوەی لەگەڵ وەزیری دەرەوەی ئەم وڵاتە، بە ڕۆژنامەنووسانی ڕاگەیاند: "ئاڵوگۆڕی پەیام لە نێوان ئێران و ئەمەریکادا کە بە ناوبژیوانیی عومان دەکرا، بە هۆی دۆخی ناوچەکەوە ڕاگیراوە".
وەزیری دەرەوەی ئێران لە درێژەی گەشتەکەیدا بۆ وڵاتانی عەرەبی ناوچەکە گەیشتە مەسقەت و لەگەڵ هاوتا عومانییەکەی کۆبووەوە.
عەباس عراقچی لە پاش کۆبوونەوەکە بە ڕۆژنامەنووسانی ڕاگەیاند: "ئاڵوگۆڕی پەیام لە نێوان ئێران و ئەمەریکادا کە بە ناوبژیوانیی عومان دەکرا، بە هۆی دۆخی ناوچەکەوە ڕاگیراوە".
عەباس عراقچی، وەزیری دەرەوەی ئێران دەشڵێت: "ئەو ڕەوتەی بە ناوی ڕەوتی مەسقەت لە ئارادا بوو و هەموو لایەک لێی ئاگادارن، کە بەشێوەی ناڕاستەوخۆ و بە ناوبژیوانیی عومان، کۆمەڵێک پەیام لە نێوان ئێران و ئەمەریکادا ئاڵوگۆڕ دەکرا، ئەم ئاڵوگۆڕی پەیامە بە هۆی دۆخی ناوچەکە ڕاگیراوە و ئێمە بوارێک بۆ بەردەوامبوونی گفتوگۆکان نابینین، تا ئەو کاتەی ئەم قەیرانە تەواو دەبێت. ئەوکات بڕیاری لێ دەدەین کە ئاخۆ گفتوگۆیەکی نوێ دەست پێ بکەین یا نا و ئەگەر دەست پێ بکەین، چۆنی بکەین".
قسەکانی عراقچی لە کاتێکدایە زیاتر لەدوو هەفتەیە ئێران چاوەڕوانیی کاردانەوەی سەربازیی ئیسرائیل دەکات، عێراقچی ڕاشیگەیاند: "وڵاتەکەی خوازیاری جەنگ نییە بەڵام بۆ جەنگ ئامادەیە".
گوتیشی: "ئێمە خوازیاری جەنگ و پێکدادان نین ئەگەرچی بە تەواوی بۆ جەنگیش ئامادەین. پێمان وایە دەبێ دیپلۆماسی کارا بکرێ و ڕێگا لە سەرهەڵدانی قەیرانێکی زۆر گەورە لە ناوچەکە بگرێت".
وەزیری دەرەوەی ئێران بەر لە عومان سەردانی هەریەک لوبنان، سووریا، سعوودیە، قەتەر و عێراقی کردبوو، هاوکات لەگەڵ گەشتەکەی عراقچی بۆ مەسقەت، کەناڵی (کان) ی ئیسرائیل ڕایگەیاند: ئێران لە ڕێگەی یەکێک لە وڵاتانی ناوچەکەوە ئەو پەیامەی گەیاندووەتە سەرۆک وەزیرانی ئیسرائیل، کە ئەگەر کاردانەوەی ئیسرائیل سنووردار بێت ئەوا تاران ئەمە وەک کۆتاییی ئەم خولەی گرژییەکانی نێوانیان لێک دەداتەوە.
