فوئاد حوسێن: بارودۆخی سیاسی و ئەمنیی ڕۆژهەڵاتی ناوەڕاست کاریگەری لەسەر عێراق دەبێت
ئه‌نجوومه‌نی وه‌زاری ئابووریی عێراق كۆ ده‌بێته‌وه؛ هاوكات جێگری سه‌رۆك وه‌زیران و وه‌زیری ده‌ره‌وه هۆشداری له كاریگه‌رییه‌كانی بارودۆخی سیاسی و ئه‌مه‌نی ناوچه‌كه به‌سه‌ر ئابووریی عێراق ده‌دات.
دووشه‌ممه، 4ـی تشرینی دووه‌می 2024، فوئاد حوسێن، جێگری سه‌رۆك وه‌زیران و وه‌زیری ده‌ره‌وه عێراق سه‌رپه‌رشتیی كۆبوونه‌وه‌ی سی و سێیه‌مینی ئه‌نجوومه‌نی وه‌زاری ئابووری كرد كه تێیدا تاوتوێی دۆخی دارایی و ئابووری عێراق كرا له سۆنگه‌ی ئاڵنگارییه ناوخۆیی و ده‌ره‌كییه‌كان به‌تایبه‌ت ململانێ سه‌ربازی و ئه‌منییه‌كانی ڕۆژهه‌ڵاتی ناوه‌ڕاست و كاریگه‌رییه‌كانی به‌سه‌ر ئابووریی عێراق.
هه‌روه‌ها له كۆبوونه‌وه‌كه‌دا تێكڕای داهاته گشتییه‌كانی عێراق له سه‌رچاوه نه‌وتی و نانه‌وتییه‌كان و تێكڕای خه‌رجییه‌كان و پابه‌ندییه داراییه‌كانی سه‌ر حكوومه‌ت خرایه‌وه‌ته ڕوو.
فوئاد حوسێن له كۆبوونه‌كه‌دا ئاماژه‌ی به‌وه كرد، بارودۆخه سیاسی و ئه‌منییه‌كان كه ڕووبه‌ڕووی ناوچه‌كه بووه‌ته‌وه، كاریگه‌ریی ڕاسته‌وخۆیان به‌سه‌ر ئابووریی عێراق هه‌یه.
فوئاد حوسێن جه‌ختیشی كردووه‌ته‌وه، هه‌ر ئاڵۆزی و گرژییه‌ك له‌و نێوه‌نده‌دا، كاریگه‌ری گه‌وره‌ی به‌سه‌ر ناجێگیری نرخی نه‌وت و ناسه‌قامگیریی بازاڕی ناوخۆیی و ده‌ره‌كیی ده‌بێت.