نەتەوە یەکگرتووەکان: زیاتر لە ملیۆنێک لوبنانی ئاوارە بوون

نەتەوە یەکگرتووەکان ڕایگەیاند، بەھۆی ھێرشەکانی ئیسرائیل بۆ سەر لوبنان، تا ئێستە یەک ملیۆن 400 ھەزار کەس ئاوارەبوون.

نووسینگەی نەتەوە یەکگرتووەکان لە جنێڤ لە ڕاگەیاندراوێکدا ئاماژەی بەوەدا، بەھۆی ھێرشە بەردەوامەکانی ئیسرائیل، تا دێت ئاسایشی خۆراک لە لوبنان خراپتر دەبێت.

ڕاشیگەیاند، ئێستە بەھۆی ھێرشەکانی ئیسرائیلەوە بۆ سەر لوبنان، سێ ھەزار و 189 کەس کوژراون، ھەروەھا یەک ملیۆن 400 ھەزار کەسیش ئاوارەبوون.

باسی لەوەش کرد، ئێستە خەڵکی لە لوبنان پێویستیان بە یارمەتی مرۆیی بەپەلە ھەیە.

لە 23ـی ئەیلوولی 2024ەوە ئیسرائیل هێرشی کردە سەر لوبنان، جگە لەکوژران و برینداربوونی زیاتر لە 17 هەزار کەس، زیاتر لە ملیۆنێک لوبنانیش ئاوارەبوون، نزیکەی 70 هەزاریان ئاوارەی دەرەوەی وڵات بوون.

ڕۆژی یەکشەممە، 10-11-2024، وەزارەتی تەندروستی لوبنان ڕایگەیاند، "بەهۆی هێرشەکانی ئیسرائیلەوە 3189 کەس کوژراون و 14078 کەسیش بریندار بوون".