یەحیا ڕەسوڵ: تۆڕێکی ماددەی هۆشبەر دەیانویست بڕێکی زۆری ماددەی هۆشبەر بێننە نێو عێراق
گوتەبێژی فەرماندەی گشتی هێزە چەکدارەکانی عێراق، لیوا یەحیا ڕەسوڵ ڕایگەیاند: بە چاودێریی و بەدواداچوونی بەردەوامی هێزەکانی هەواڵگریی نیشتمانی، تۆڕێکی نێودەوڵەتی بازرگانانی ماددە هۆشبەرەکان دەستگیر کران کە هەوڵیان دەدا بڕێكی زۆری ماددەی هۆشبەر بێننە نێو عێراق و وڵاتانی دراوسێ.
پێنجشەممە 28ـی تشرینی دووەمی 2024، لیوا یەحیا ڕەسوڵ، گوتەبێژی فەرماندەی گشتی هێزە چەکدارەکانی عێراق ڕایگەیاند: ماوەیەکە هێزەکانی هەواڵگریی نیشتمانی بەدواداچوون و چاودێریی بازرگانانی ماددەی هۆشبەر دەکەن و توانیان تۆڕێکی نێودەوڵەتی بازرگانانی ئەو ماددە هۆشبەرانە دەستگیر بکەن، هەروەها دەست بەسەر 48 کیلۆگرام لە ماددەی هۆشبەری کریستالدا گیرا.
ئەو گوتەبێژە دەشڵێت: تۆڕەکە هەوڵیانداوە کە ئەو بڕە زۆرەی ماددەی هۆشبەر بێننە نێو عێراق، دەشڵێت: تۆڕەکە نەوەک هەر هەوڵیان داوە ماددە هۆشبەرەکە لە عێراق و ناوچە جیاجیاکان ساغ بکەنەوە، بەڵکو هەوڵیانداوە کە بڕێکی دیکە ببەنە وڵاتانی دراوسێی عێراقیش، ئاماژە بەوە دەکات کە زانیارییە هەواڵگرییەکان هاوکار بوون لە ئاشکرا کردنی ئەو تۆڕە نێودەوڵەتییەی ماددە هۆشبەرەکان.
