ڕووسیا داوای لە هاووڵاتییانی دەکات سووریا جێبهێڵن

پێشڕەویی گرووپە چەکدارەکانی ئۆپۆزسیۆنی سووریا بەرەو دیمەشق دەچێت و باڵیۆزخانەی ڕووسیاش لە سووریا داوای لە هاووڵاتییانی ڕووسی دەکات دیمەشق ناوچەکانی دیکەی سووریا جێبهێڵن و بگەڕێنەوە ڕووسیا.

لە ڕاگەیەندراوەکەدا هاتووە، بەهۆی شڵەژان و تێکچوونی دۆخی سیاسی و سەربازی  لە سووریا، باڵیۆزخانەی ڕووسیا لە دیمەشق داوا لە سەرجەم ئەو هاووڵاتییە ڕووسیانە دەکات لە سووریا دەژین و نیشتەجێ بوون، ئەگەر ئارەزووی گەڕانەوەیان بۆ ڕووسیا هەیە، ئەوە دەرفەت ڕەخسێندراوە کە بەگەشتی بازرگانی لە ڕێگەی فڕۆکەخانەی دیمەشق بەرەو مۆسکۆ بگەڕێنەوە.

دوای هێرشی گرووپە چەکدارەکانی ئۆپۆزسیۆنی سووریا و کۆنترۆڵکردنی پارێزگاکانی حەلەب و حەما و کشانەوەی سوپای ڕژێمی سووریا بەبێ بەرگری، ئێستا پێشڕەوییەکانی چەکدارانی تەحریرولشام گەیشتوونەتە شاری حومس کە دەکەوێتە باکووری دیمەشق و بە گوێرەی پێشبینییەکان، ئەگەر هەیە لە چەند کاتژمێری داهاتوودا چەکدارانی ئۆپۆزسیۆن حومسیش کۆنترۆڵ بکەن.