لە بەرلین ڕەوەندی کوردستانی هەرچوار پارچە کۆ دەبنەوە

کۆنفدراسیۆنی ڕەوەندی کوردستانی سبەینێ شەممە 7ی کانوونی یەکەمی 2024، دووەمین کۆنگرەی لە بەرلین لەژێر ناونیشانی (یەکگرتنی ئێمە سەرکەوتنی ئێمەیە) ساز دەکات و کوردستان24 ڕووماڵی کۆنگرەکە دەکات.

دووەم کۆنگرەی کۆنفدراسیۆنی ڕەوەندی کوردستانی دوو ڕۆژ بەردەوام دەبێت و ڕێکخراوەکان، سەنتەرە کوردییەکانی هەرچوار پارچەی کوردستان بەشداری دەکەن. 

بارزان حەسەن نێردەی کوردستان24 کە ڕووماڵی چالاکییەکانی کۆنگرەکە دەکات، لە بەرلینەوە ڕایگەیاند، بەشداربووانی دووەمین کۆنگرەی کۆنفدراسیۆنی ڕەوەندی کوردستانی دەیانەوێت خوێندنەوە و هەڵسەنگاندنی کار و بەرنامەکانی سێ ساڵی ڕابردوو بکەن و خۆیان ئامادە بکەن و پلان بۆ سێ ساڵی داهاتوو ئامادە بکەن. 

هەروا ئاماژەیدا، بڕیارە لەم کۆنگرەیەدا کەسایەتی تازە لە پۆست و کۆمیتەکان دابنرێن و بە بەرگێکی تازەوە کۆنفدراسیۆنی ڕەوەندی کوردستانی لە ئەورووپا درێژە بەکار و چالاکییەکانی بدات.

هەروەها شیفا بارزانی نوێنەری سەرۆک بارزانی کە سەرپەرشتیی کۆنفدراسیۆنی ڕەوەندی کوردستانییە لە ئەورووپا بەشداری کۆنگرەکە دەکات و دوو ڕۆژ، شەممە و یەکشەممە بەردەوام دەبێت.

ناوەندی ڕەوەندی کوردستانی، ڕێکخراوێکە لەڕووی سیاسیی و ئایینیەوە بێلایەنە، کاروچالاکییەکانی لەسەر بنەمای دیموکراسی، ئاشتی و ئازادی ڕادەربڕین و پێکەوە ژیان و یەکسانییە؛ هەروەها دژی هەموو جۆرە تووندوتیژی و دەمارگیری و نەتەوەپەرەستییەکە، هاوکات بووەتە چەتری کۆکەرەوەی هەموو تاک، کۆمەڵە، ڕێکخراو، مەڵبەند، فیدراسیۆن و پێکهاتەیێکی دیکەی ڕەوەندی کوردستانی لە تاراوگە، ئە‌وانە‌ی باوەڕیان بە خاک و نەتەوەو ئاڵای کوردستان هەیە و بووەتە پردێکی پتەوی پەیوەندی لەنێوان دیاسپۆڕای کوردستانی و وڵاتی دایک ( کوردستان ) و بڕوای تەواوی بە مافی چارەی خۆنووسیی نەتەوەی کورد هەیە .