ریاز ئەسعەد: گرووپە چەکدارەکانی سووریا ڕەزامەندییان دەربڕیوە چەکەکانیان ڕادەستی دەوڵەت بکەن
دامەزرێنەری سوپای ئازادیی سووریا، جەختی کردەوە؛ کە دەبێت پەکەکە بە زووترین کات وڵاتەکە جێبهێڵێت و چەکەکان ڕادەست بکات.
ئەمڕۆ یەکشەممە 22ـی کانوونی یەکەمی 2024، ریاز ئەسعەد، دامەزرێنەری سوپای ئازادیی سووریا، تایبەت بە کوردستان24ـی ڕاگەیاند: هەموو گرووپە چەکدارەکان ڕەزامەندیان دەربڕیووە بۆ ئەوە ببن بە بەشێک لە دامەزراوەی سەربازیی و ئەمنیی سووریای نوێ و چەکەکانیان ڕادەست بکەن.
هاوکات دەڵێت: "دەبێت هەرچی زووە پەکەکە خاکی سووریا جێبهێڵێت و چەکەکان ڕادەست بکات، چونکە پەکەکە ڕێکخراوێکی تیرۆریستییە و هیچ شوێنیکی لە سووریادا نییە".
ناوبراو گوتی: ڕێگە بە هیچ کەسێک نادرێت لە دەرەوەی دەسەڵاتی دەوڵەت چەک هەڵگرێت، وەزارەتی بەرگریی و وەزارەتی ناوخۆی سووریا تاکە لایەنن مافی ئەوەیان هەیە چەکیان لە دەستدا بێت.