لە شەڕ و پێکدادانی نێوان هەسەدە و گرووپە چەکدارەکان زیاتر لە 100 کەس کوژران
تاوەکوو ئێستا شەڕو پێکدادان لە نێوان گرووپە چەکدارەکان و هێزەکانی سووریای دیموکرات 'هەسەدە' بەردەوامە، هەروەها بەگوێرەی زانیارییەکان هەسەدە لە دەورووبەری مەنبج و بەنداوی تشرین، بەرپەرچی چەند هێرشێکی داوەتەوە.
لەوبارەوە ڕامی عەبدولرەحمان، بەڕێوەبەری ڕوانگەی سووری بۆ مافەکانی مرۆڤ ڕایگەیاند "شەڕەکە لە دەورووبەری باشوور و ڕۆژهەڵاتی مەنبج چڕ بووەتەوە، ئاماژەی بەوەش دا، تاوەکوو ئەمڕۆ یەکشەممە، 101 کەس لە هەردوولا کوژراون."
گوتیشی: 85 کەس لە گرووپە چەکدارەکان کوژراون و 16 کوژراویش سەر بە هێزەکانی سووریای دیموکراتن.
ڕۆژی یەکشەممە، 8ـی کانوونی یەکەمی 2024، هێزەکانی ئۆپۆزیسیۆنی سووریا دەستیان بەسەر دیمەشقدا گرت و کۆنترۆڵیان کرد، لە کاتی کۆنترۆڵکردنی دیمەشق، بەشار ئەسەدی سەرۆکی پێشووی ڕژێمی سووریا بەرەوە ڕووسیا ڕای کرد. لە دوای هێوربوونەوەی دۆخەکە حکوومەتی کاتیی سووریا داوای کرد هێزەکانی هەسەدە چەک دابنێن.
