بەهۆی ئاگرەکەی لۆس ئەنجلس 16 کەس گیانیان سپاردووە و 12 هەزار ماڵیش وێران بوون
ئاگرەکەی لۆس ئەنجلس هەندێک لە گەڕەکەکانی شارەکەی بە تەواوی وێران کردووە و دەیان هەزار کەسی ناچار بەچۆڵکردنی ناوچەکە کردووە، هەروەها کاربەدەستانیش دەڵێن لانی کەم 16 کەس مردوون و زیاتر لە 12 هەزار ماڵ و باڵەخانە وێران بوونە.
بەگوێرەی میدیاکانی ئەمەریکا "زیاتر لە 60 میل چوارگۆشە سووتاوە و مەترسییەکان هەر ماوە، ئاگرەکە شەوی شەممە چڕتر بووەتەوە، خزمەتگوزاریی کەشناسیی نیشتیمانی بەردەوامە لە هۆشداریی لەسەر مەترسی ئاگرەکە لە هەموو ناوچەکانی لۆس ئەنجلس و ڤێنتورا."
ئاگرەکەی پالیسایدس هێشتا گەورەترین ئاگرە و بەرپرسان فەرمانی چۆڵکردن و هۆشدارییان بە ناوچەکانی ئینسینۆ و برێنتوود، داوە. ئاگرەکەی ئیتۆن لە ئاڵتادینا لە باکووری لۆس ئەنجلس، بەلایەنی کەمەوە 11 کەسی گیانیان سپاردووە و زیاتر لە 22 میل چوارگۆشەی ناوچەکەشی سوتاندووە.
تیمەکانی ئاگرکوژێنەوە پێشکەوتنێکی باشیان هەبووە لەوەی ئاگرەکەی کێنیس و هێرست نەگاتە دۆڵی سان فێرناندۆ لە لۆس ئەنجلس.
سی بی ئەی نیوز بڵاوی کردەوە "دانیشتووان نیگەرانن چونکە بەرپرسانی لۆس ئەنجلس لە ئاگادارکردنەوەی خەڵکی ناوچەکە بۆ چۆڵکردنی ماڵەکانیان، شکستیان هێناوە."
