سیاسی

ئوسترالیا..زریانی ئەلفرێد کارەساتی ناوەتەوە

جیهان لافاو و زریان

 یەکشەممە، 9ـی ئاداری 2025، ئەنتۆنی ئەلبانیز، سەرۆک وەزیرانی ئوسترالیا ڕایگەیاند، بەهۆی زریانی "ئەلفرێد"وە زیاتر لە 12 سەرباز بریندار بوون.

ئەلبانیز ئاماژەی بەوەش کرد، ئێوارەی ڕۆژی شەممە، لەکاتی وەرگەڕانی دوو ئۆتۆمبێلی سەربازی کە 32 سەربازی تێدابووە، 12 سەرباز بریندار بوون، لەنێویاندا 6 سەربازیان برینیان سەختە.

سەربازەکان لە ڕێگادا بوون بۆ شاری لیسمۆر لە باشووری شاری بریسبان بۆ ئەوەی یارمەتی و هاوکاریی بە هاووڵاتییان بگەیەنن، دوای لافاوێک کە بەهۆی زریانی ئەلفرێدەوە لەو شارە ڕووی دا.

پۆلیسی نیو ساوس وێڵز ڕایگەیاندووە، یەکێک لە ئۆتۆمبێلەکان لە ڕێگاکە دوور کەوتووەتەوە و چەند جارێک لە کێڵگەیەکی بچووکدا وەرگەڕاوە، ئۆتۆمبێلی دووەمیش لەکاتی هەوڵدان بۆ دوورکەوتنەوە لە ئۆتۆمبێلی یەکەم، بەلای خۆیدا وەرگەڕا.

پۆلیس ئاماژەی بەوەش کردووە "ئەو دوو ئۆتۆمبێلە پێکدادانیان نەکردووە"، بەڵام کەسێک بەهۆی زریانەکەوە مردووە.

هاوکات کۆمپانیاکانی کارەبای ئوسترالیا ئەمڕۆ یەکشەممە، ڕایانگەیاند، زریانی ئەلفرێد بووە هۆی پچڕانی تەزووی  کارەبا بەشێوەیەکی بەرفراوان لە ڕۆژهەڵاتی ئوسترالیا و نزیکەی 330 هەزار ماڵ بێ کارەبان.

ئەنتۆنی ئەلبانیسی سەرۆک وەزیران هۆشداریدا و گوتی: دۆخی کوینزلاندی باکوور و باکووری نیو ساوس وێڵز بەهۆی لافاو و بای بەهێزەوە تا ئێستا مەترسیدارە.

 
 
 
 
 
 
لاڤین عومەر ,
Fly Erbil Advertisment