فڕۆکەیەکی سەربازیی تورکیا کەوتە خوارەوە

K24- هەولێر:

ئاژانسی هه‌واڵی ئانادۆڵوی توركی بڵاویکردەوە، حەوت ئەندامی هێزە ئەمنییەکانی تورکیا بەهۆی کەوتنە خوارەوەی فڕۆکەکەیان لە پارێزگای وان گیانیان لەدەستداوە کە دووانیان فڕۆکەوان بوون.

بەگوێرەی ئاژانسەکە، ئەو فڕۆکەیە چاودێری پارێزگاكانی هەکاری و وانی کردووە بە تایبەت کە ئێستا شه‌ڕی نێوان پارتی کرێکارانی کوردستان و سوپای تورکیا لە سنووری نێوان تورکیا و عێراق گەرمە.

مەحمەت ئەمین بیلمێز، پارێزگای وان، لە تویتێکدا ئەو حەوت ئەندامەی هێزە ئەمنییەکانی بە "پاڵەوان" ناوبردووە و وەزیری بەرگری تورکیاش چووەتە شوێنی رووداوەکە. بڕیاریش دراوە لێکۆڵینەوە لە هۆکاری کەوتنە خوارەوەی فڕۆکەکە بکرێت، كه‌ تا ئێستا نازانرێت هۆكاری كه‌وتنه‌ خواره‌وه‌ی چییه‌. 

H.J