4 کەسی دیكە لە گەرمیان بەهۆی كۆرۆنا گیانیان لەدەستدا
تا ئێستا 57 كەس لە سنووری ئیدارەی گەرمیان بەهۆی پەتاكەوە مردوون
K24- گەرمیان:
4 كەسی دیكە لە سنووری ئیدارەی گەرمیان بەهۆی ڤایرۆسی كۆرۆنا گیانیان لەدەستدا و ژمارەی تووشبووانیش گەیشتە سەرووی هەزار و 900 كەس.
سەرچاوەیەك لە بەڕێوەبەرایەتی گشتیی تەندروستی ئیدارەی گەرمیان تایبەت بە كوردستان 24 رایگەیاند، ئەمڕۆ 4 كەسی دیكە بەهۆی كۆرۆنا لە سنووری ئیدارەكەیان گیانیان لەدەستداوە.
ئاشكراشی كرد، ئەوانەی گیانیان لەدەستداوە، لە 2 ئافرەت و 2 پیاو پێكهاتوون.
ئەو سەرچاوەیە كە نەیویست ئاماژە بە ناوی بكرێت گوتیشی: تا ئێستا 57 كەس بەهۆی پەتاكەوە لە سنووری ئیدارەكەیان گیانیان لەدەستداوە و هەزار و 914 حاڵەتی تووشبوونیش بە پەتاكە تۆماركراون، لەو ژمارەیەش 420 كەس بە تەواوەتی چاك بوونەتەوە.
H.B