سلێمانی.. پاسێکی قوتابییان وەرگەڕا و 14 قوتابی بریندار بوون
لە ڕووداوێکی هاتوچۆ لە سلێمانی ژمارەیەک قوتابی بریندار بوون و بەڕێوەبەرایەتیی هاتوچۆش دەڵێت، ڕووداوەکە بەهۆی ناشارەزایی و کەمترخەمیی شۆفێرەکە بووە.
سامان نادر، بەرێوبەری فریاکەوتنی خێرای سلێمانی 122، ئەمڕۆ چوارشەممە، 30ـی نیسانی 2025، تایبەت بە ماڵپەڕی کوردستان24ـی گوت: ئێوارەی ئەمڕۆ دوای کاتژمێر چوار، پاسێکی قوتابییان لەسەر ڕێگەی کونەماسی نزیک گوندی کارێزە وەرگەڕا و ژمارەیەک قوتابی بریندار بوون.
سامان نادر گوتیشی: کاتێک گەیشتین شوێنی ڕووداوەکە تەنیا پاسە وەرەگەڕاوەکەمان بینی، 14 قوتابی دەم و دەست ڕەوانەی نەخۆشخانەی فریاکەوتنی شار کران و ئێستا دۆخی تەندروستییان جێگیرە.
سامان نادر باسی لەوەش کرد، بریندارەکان لە نەخۆشخانە ماون و قوتابی قۆناغی بنەڕەتیین.
لەلای خۆیەوە بەڕێوەبەرایەتیی هاتوچۆی سلێمانی بڵاوی کردووەتەوە و ڕایگەیاندووە: هۆی ڕووداوەکە نەشارەزایی و کەمتەرخەمیی شۆفێرەکە بووە.
