عێراق ڕیزبەندی سێیەمی جیهانی گرتووە لە بەرەنگاربوونەوەی ماددە هۆشبەرەکان

عێراق لە لوتکەی پۆلیسی جیهانیدا، بۆ بەرەنگاربوونەوە و کۆنترۆڵکردنی ماددە هۆشبەرەکان، لە ئاستی جیهان و کۆی 138 وڵات، پلەی سێیەمی بەدەست هێنا.

وەزارەتی ناوخۆی حکوومەتی عێراق ڕاگەیەندراوێکی بڵاو کردووەتەوە و ئاماژەی داوە، بە هەوڵ و شەونخونیی ڕۆڵە قارەمانەکان و دڵسۆزیان لە بەرەنگاربوونەوەی ماددە هۆشبەرەکان، عێراق چووەتە ڕیزبەندی وڵاتە پێشەنگ و پێشکەوتووەکان، ئێستا عێراق لە نێو 138 وڵات و 205 ڕێکخراوی حکوومەتی و ناحکوومەتی توانیویەتی پلەی سێیەمی جیهان بگرێت.

بە گوێرەی ئەو پۆلێن و ڕیزبەندییەی بۆ وڵاتان لە بەرەنگاربوونەوەی ماددە هۆشبەرەکان بڵاو کراوەتەوە، هیندستان لە پلەی یەکەمی جیهان و جەبەل ئەسوەد "مۆنتی نیگرۆ" لە پلەی دووەم دێن، دوای ئەوانیش عێراق پلەی سێیەمی گرتووە، ئەمەش بەپێی ئەو پۆلێنەی لە دووەمین لوتکەی پۆلیسی جیهانی دانراوە، کە لەلایەن پۆلیسی دوبەی ڕێکخرا بوو.