" UN و ئەمەریکا داوای چارەسەرکردنی کێشەکانی هەولێر و بەغدا دەکەن"
راوێژکارێکی کازمی: ھەردوولا ویستی چارەسەرکردنی کێشەکانیان هەیە
K24 - واشنتن
حوسێن هینداوی، راوێژکاری مستەفا کازمی سەرۆک وەزیرانی عێراق لە لێدوانێکی تایبەتدا بۆ کوردستان24 رایگەیاند، کۆمەڵگەی نێودەوڵەتی، نەتەوە یەکگرتووەکان و ئەمەریکا بەردەوام داوا دەکەن، کە لەنێوخۆی عێراق لایەنە سیاسییەکان، حکومەتی هەرێمی کوردستان و حکومەتی عێراق کێشەکانیان چارەسەر بکەن و جەختیش لەسەر گفتوگۆی نێوان هەردوولا و چارەسەرکردنی کێشەکان دەکەنەوە.
گوتیشی: "پەیوەندییەکانی نێوان هەرێمی کوردستان و حکومەتی عێراق ئاساییە و بەردەوام گفتوگۆ و کۆبوونەوە لەسەر چارەسەرکردنی کێشەکان هەیە، هەروەها هەردوولا ئارەزووی چارەسەرکردنی تەواوی کێشەکانیان هەیە، کە لە بەرژەوەندی خەڵک بێت. کۆمەڵگەی نێودەوڵەتی، نەتەوە یەکگرتووەکان و ئەمەریکا بەردەوام داوا دەکەن، لایەنە سیاسییەکان، حکومەتی هەرێمی کوردستان و حکومەتی عێراق کێشەکانیان چارەسەر بکەن و جەختیش لەسەر گفتوگۆی نێوان هەردوولا و چارەسەرکردنی کێشەکان دەکەنەوە، چونکە خەڵک ئازاری زۆریان بەدەست نەبوونی خزمەتگوزارییەوە چەشتووە".
ئاماژەی بەوەشكرد: "ئەمەریکا داوا دەکات، کێشەکان لە رێگەی دانیشتن و گفتوگۆی برایانە چارەسەر بکرێن، هەرێمی کوردستان و حکومەتی عێراقیش ویستی چارەسەرکردنی کێشەکانیان هەیە".
