پشتیوان سادق: ئەوەی بەغدا بە کوردی دەکات، هیچ دوژمنێک نایکات
وەزیری ئەوقاف و کاروباری ئایینی لە حکوومەتی هەرێمی کوردستان ڕایگەیاند، زۆر نیگەرانین کە حکوومەتی فیدراڵ بە بڕیارێکی نادەستووری و نایاسایی، مووچەی مووچەخۆرانی لە جەژنی قورباندا بڕی.
ئەمڕۆ هەینی، 6ـی حوزەیرانی 2025، پشتیوان سادق، وەزیری ئەوقاف و کاروباری ئایینی لە حکوومەتی هەرێمی کوردستان، لە کۆنگرەیەکی ڕۆژنامەوانیدا ڕایەگەیاند "ئێمە زۆر نیگەرانین کە حکوومەتی فیدراڵ بە بڕیارێکی نادەستووری و نایاسایی، مووچەی مووچەخۆرانی لە جەژنی قورباندا بڕی، بێگومان بڕوا ناکەم هیچ حکوومەتی جیهان، لە بۆنەیەکی وادا مووچەی هاووڵاتییانی ببڕێت."
وەزیری ئەوقاف و کاروباری ئاینی دەڵێت: حکوومەتی هەرێمی کوردستان، هەموو پابەندییەکانی خۆی بەپێی دەستوور و یاسا جێبەجێ کردووە، ئەوەی حکوومەتی عێراق کردی سزادانی بە کۆمەڵەی خەڵکی کوردستانە، هیچ جیاوازییەکی نییە لەگەڵ ڕژێمە یەک لەدوای یەکەکان لە دژی خەڵکی کوردستان دەیان کرد.
دەشڵێت: لە ڕووی ئاینیی و مرۆییەوە، سەرپێچییەکی ئێجگار گەورەیە، ئێمە لە مێژووی هیچ وڵاتێکی دیکەدا شتی وامان نەبیستووە و نەبینیوە، وەک ئەوەی ئێستا حکوومەتی فیدراڵ دەیکات، هیچ دوژمنێک نایکات.
پشتیوان سادق، ڕاشیگەیاند "هەر وەک لە ڕاگەیەندراوەکەی ئەنجوومەنی وەزیرانی حکوومەتی هەرێمی کوردستاندا هاتووە، داکۆکی دەکات و هەوڵی ڕژد دەدات لە ئاستی کۆمەڵگای نێودەوڵەتی جیهان، لەگەڵ بەغداش هەوڵی ڕژد دەدرێت بۆ ئەوەی ئەو گرفتە چارە بکرێت، چونکە زوڵمێکی زۆر گەورەیە لە بەرامبەر هاووڵاتییانی کوردستان دەکرێت."
