قەتەر ئاسمانیی وڵاتەکەی داخست
وەزارەتی دەرەوەی قەتەر ڕاگەیاند، لەپێناو سەلامەتی هاووڵاتییان و گەشتیاران، بەشێوەیەکی کاتی گەشتە ئاسمانییەکانی وڵاتەکەی ڕادەگرێت و ئاسمانی وڵاتەکەی دادەخات.
دووشەممە، 23ـی حوزەیرانی 2025، وەزارەتی دەرەوەی قەتەر ڕاگەیاندووە، بۆ دڵنیابوون لە سەلامەتی هاووڵاتیان و گەشتیاران، دەسەڵاتە پەیوەندیدارەکان بریاریاندا بە ڕاگرتنی سەرجەم گەشتە ئاسمانییەکان بەشێوەیەکی کاتی.
لە ڕاگەیاندراوەکەدا هاتووە، لایەنە پەیوەندیدارەکان بەردەوام چاودێری بارودۆخەکە دەکەن و هەڵسەنگاندن بۆ ئەگەری ڕوودانی هەر پێشهاتێک دەکەن.
وەزارەتی دەرەوەی قەتەر، جەخت لە سەلامەتی سەرجەم هاووڵاتییان و گەشتیاران دەکاتەوە، هەروەها ئاماژەیداوە، هەر ڕێککارێک پێویست بێت لەپێناو پاراستنی گیانی گەشتیاران و هاوولاتییانی قەتەر دەیگرنەبەر.
ئەمە لەکاتێکدایە ئەمڕۆ دووشەممە، ئاژانسی هەواڵی ڕۆیتەرز بڵاویکردەوە، ئەگەری هەیە ئێران لە 48 کاتژمێری داهاتوو وەڵامی ئەمەریکا بداتەوە و هەروەها ئاژانسەکە لەسەر زاری دوو سەرچاوەی دیکەی ئەمەریکی ئاماژەی داوە، ئەمەریکا هەڵسەنگاندنی بۆ ئەوە کردووە کە ڕەنگە ئێران بەم نزیکانە هێرش بکاتە سەر بنکە سەربازییەکانیان لە ڕۆژهەڵاتی ناوەڕاست.
