خەمیس خەنجەر بەبۆنەی 79 ساڵەی دامەزراندنی پارتی پیرۆزبایی لە سەرۆک بارزانی دەکات
"پارتی بەشدار بووە لە چەسپاندنی پێکەوەژیان"
خەمیس خەنجەر، سەرۆکی هاوپەیمانی سیادە، لە یادی 79 ساڵەی دامەزراندنی پارتی دیموکراتی کوردستان پەیامێکی ئاراستەی سەرۆک بارزانی کرد و گوتی: پارتی بەشدار بووە لە چەسپاندنی پێکەوەژیان.
شەممە، 16ـی ئابی 2025، خەمیس خەنجەر لە پەیامەکەیدا دەڵێت: لە یادی 79 ساڵەی دامەزراندنی پارتی دیموکراتی کوردستان، پیرۆزبایی خۆمان ئاراستەی جەنابی سەرۆک مەسعود بارزانی و سەرکردایەتی و کادیران و لایەنگرانی ئەو حزبە دەکەین.
گوتیشی: ڕۆڵ و پێگەی پارتی لە سیاسەت و مێژووی هەرێمی کوردستان و عێراق بەرز دەنرخێنین.
خەمیس خەنجەر ئاماژەی بەوەش دا، ئەو حزبە لە سەرەتای دامەزراندنیەوە یەکێک بووە لە پێکهاتە دیارەکانی سیاسی کوردستان و عێراق، هەروەها بەشداری لە چەسپاندنی پێکەوەژیان و پتەوکردنی هاوبەشی کردووە.
لەپەیامەکەیدا دەڵێت: بەم بۆنەیەوە داوای بەردەوامی کاری هاوبەش لە نێوان هەموو هێزە سیاسییەکان دەکەین بۆ گەیشتن بە سەقامگیری سیاسی، ئەمنی و ئابووری، هەروەها هەموو هەوڵێک بۆ چارەسەرکردنی ناکۆکیەکان لە ڕێگەی گفتوگۆی جددیەوە بخرێتەگەڕ.
باسی لەوەش کردووە، داوا لە هەموو لایەنەکان دەکەین ئەو بەڵێن و پابەندیانە جێبەجێ بکەن کە واژۆیان کردووە بۆ دەستەبەرکردنی دادپەروەری و یەکسانی لە نێوان پێکهاتەکانی گەلی عێراق و چارەسەری ئەو نادادپەروەری و پێشێلکاریانە بکەن کە ڕووبەڕووی گەلی عێراق دەبێتەوە.
