دیلان ڕواندزی: پلەکانی گەرما دادەبەزن و ئەگەری باران بارین هەیە

گوتەبێژی وەزارەتی گواستنەوە و گەیاندن ڕایدەگەیەنێت: لە ئەمڕۆوە پلەکانی گەرما دادەبەزن و ئەگەری هەیە هەفتەی داهاتوو، لە ناوچە شاخاوییەکانی کوردستان بارانێکی کەم بۆ کاتێکی کورت ببارێت.

دووشەممە 18ـی ئابی 2025، دیلان ڕواندزی، گوتەبێژی وەزارەتی گواستنەوە و گەیاندن بە کوردستان24ـی ڕاگەیاند: ئەمڕۆ کاریگەریی خۆڵبارین لەسەر هەولێر و هەرێمی کوردستان کۆتایی دێت، دەشڵێت: سەرچاوەی خۆڵبارینەکە باکووری خۆرئاوای عێراق بووە کە ڕووی لە هەرێمی کوردستان کردووە.

گوتەبێژی وەزارەتی گواستنەوە و گەیاندن ئاماژەی بەوە کرد، پلەکانی گەرما لە ئەمڕۆوە نزم دەبنەوە، دەڵێت: پلەکانی گەرما لە بەیانی و ئێوارەدا، دوو بۆ سێ پلە نزمتردەبن لەگەڵ پلەی گەرمی لە نیوەڕۆدا، پێشبینیش دەکرێت هەفتەی داهاتوو پلەکانی گەرما لە ناوچە شاخاوییەکان زیاتر دابەزن، سەرباری ئەوەی لە هەندێ ناوچە، هەور و نیمچە هەور دروست دەبێت، پێشبینی بارینێکی کەمیش لە ناوچەکە شاخاوییەکان بۆ ماوەیەکی کورت هەیە.

هەر ئەمڕۆ دووشەممە 18ـی ئابی 2025، بەڕێوەبەرایەتی کەشناسی و بوومەلەرزەزانی هەرێم، کەشى پێشبینیکراوى 48 کاتژمێرى داهاتووی بڵاو کردەوە، بەپێێ پێشبینییەکان، ئەمڕۆ دوو شەممە  18-08-2025، ئاسمان  ساماڵ دەبێت،  لەگەڵ بوونی تۆزیکی سووک بەتایبەتی لەناوچەکانی باشووری هەرێم. پلەکانی گەرماش کەمێک نزم  دەبێتەوە بە( 1-2 ) پلە بەراوورد بە تۆمارەکانی دوێنێ.  

سبەى سێشەممە 19-08-2025، کەشوهەوا بەم شێوەیە دەبێت:

ئاسمان  ساماڵ دەبێت و پلەکانی گەرما  نزیک دەبێتەوە بەراوورد بە تۆمارەکانی ئەمڕۆ.

هەولێر :  42 پلەی سیلیزی  

سلێمانی : 40 پلەی سیلیزی

دهۆک :  40  پلەی سیلیزی

کەرکوک : 43 پلەی سیلیزی  

زاخۆ  :  41 پلەی سیلیزی

هەڵەبجە : 42 پلەی سیلیزی

سۆران : 40 پلەی سیلیزی

حاجی ئۆمەران : 30 پلەی سیلیزی