پەیامی سەرۆك بارزانی بەبۆنەی جەژنی (جەمایێ)ـی ئێزیدییەكان

K24 – هه‌ولێر:

سه‌رۆك مه‌سعود بارزانی، به‌ بۆنه‌ی هاتنه‌وه‌ی جه‌ژنی "جه‌مایێ" ئێزدییان په‌یامێكی پیرۆزبایی ئاراسته‌ی میری ئێزدییان و ئه‌نجوومه‌نی رووحانی و سه‌رجه‌م ئێزدییه‌كانی كوردستان و جیهان كرد.

ده‌قی په‌یامه‌كه‌

بەناوی خودای مەزن و دلۆڤان

بەبۆنەی هاتنەوەی جەژنی (جەمایێ)ـی ئێزیدی پیرۆزبایی لە میری ئێزیدیان و ئەنجوومەنی ڕۆحانیی ئایینی ئێزیدی و سەرجەم خوشك و برایانی ئێزیدیی كوردستان و هەموو جیهان دەكەم.

هەر لەو بۆنەیەدا پابەندبوونمان بە بنەماكانی پێكەوەژیانی ئایینی و نەتەوەیی لە كوردستان دووپات دەكەینەوە و جارێكی تر پشتیوانیی خۆشم بۆ داواكاریی و مافی ڕەوای خوشك و برا ئێزیدییەكان ڕادەگەیێنم. هیواداریشم كە خوشك و برا ئێزیدییەكانمان هەموو جەژن و خۆشییەكانیان لە كەشێكی ئارام و پڕ لە ئاسوودەیی بەڕێ بكەن و كۆتایی بەو ئێش و ئازارانە بێت كە لە چەند ساڵی ڕابردوودا بەهۆی زوڵمی تیرۆریستان بینیویانە.

جەژنتان پیرۆز و بمێنن بە خێر و خۆشی

مسعود بارزانی

6ـی 10ـی 2020